Një i vrarë, nëntë të plagosur në Lypjan

Vendi i ngjarjes

06 shtator 2009

Qamil Hoti, rreth 30-vjeç, është vrarë mbrëmë dhe 9 persona janë plagosur në një incident që ka ndodhur në fshatin Ribar i Madh i komunës së Lipjanit. Policia e Kosovës ka njoftuar se ngjarja ka ndodhur rreth orës 20, pas një fjalosjeje që ka vazhduar me një rrahje masive, e deri te përdorimi i armëve të zjarrit. Të plagosurit e tjerë janë: Fadil Hoti, Bedri Hoti, Admir Hoti, Milaim Hoti, Fehmi Duriqi, Elbasana Duriqi, Meriton Duriqi, Ramadan Duriqi si dhe Enver Hoti, gjendja shëndetësore e të cilit është e rëndë. Megjithatë, të gjithë të plagosurit që po marrin kurim në QKUK janë jashtë rrezikut për jetën. Zëdhënësi i Policisë, Arbër Beka, i ka thënë KTV-së se Policia e Kosovës po mban nën arrest Isuf Hotin dhe Xhezair Hotin, të përfshirë në incidentin e rëndë. Të tjera arrestime pritet të ndodhin brenda ditës. Familjet Hoti dhe Duriqi janë përplasur mbrëmë, si rrjedhojë e një konflikti të mëhershëm mes tyre. Policia ka konfiskuar një revole që dyshohet të jetë përdorur në këtë incident, dhe një furgon.