FOL: Kryesia e Kuvendit shkeli Kushtetutën...

Lëvizja FOL ka reaguar ndaj vendimit të Kryesisë së Kuvendit të Kosovës, e cila të martën ka kthyer mbrapsht kërkesën e Prokurorisë, për t’i marrë imunitetin deputetit të LDK-së, Agim Veliut.
Kushtetuta e Republikës së Kosovës, përkatësisht neni 75, pika 2 - sipas kësaj lëvizjeje, tregon qartë se: “Deputeti i Kuvendit nuk mund të arrestohet dhe as ndalohet përderisa është duke kryer detyrën e tij/saj si deputet i Kuvendit, pa pëlqimin e shumicës së të gjithë deputetëve të Kosovës”.

Pra, sipas këtij neni të Kushtetutës së Kosovës - vlerëson FOL - Kryesia e Kuvendit do të duhej që kërkesën e Prokurorisë të procedojë në rend të ditës në seancën e ardhshme, dhe që t’u lihet deputeteve të vendosin për këtë çështje të ndjeshme.

Po ashtu, sipas kësaj lëvizjeje, edhe Rregullorja e Punës së Kuvendit përcakton procedurat për heqjen e imunitetit të deputetit. Rregulla 13, pika 3.

Kryesia e Kuvendit të Kosovës me këtë rast – sipas lëvizjes FOL – po shkel dy dokumente bazë të funksionimit të këtij institucioni: Kushtetutën e Republikës së Kosovës dhe Rregulloren e Punës së Kuvendit.

“Prandaj, Lëvizja FOL kërkon nga Kryesia e Kuvendit të Kosovës që sa më parë të fillojë heqjen e imunitetit për të gjithë deputetët, dhe se rasti i deputetit Agim Veliu duhet të shërbejë si precedent për të gjithë të tjerët”, thuhet në komunikatën e kësaj lëvizjeje.