Mitrovicë: Dy shpërthime në dy ditë

Policia e Kosovës ka bërë të ditur se në orët e hershme të mëngjesit të sotëm, në pjesën veriore të Mitrovicës, persona të panjohur kanë hedhur një mjet shpërthyes në drejtim të një veture.
Zëdhënësi i policisë rajonale të Mitrovicës, Sami Mehmeti, tha se aktualisht nuk ka informata nëse vetura i takonte Ministrisë së Arsimit të Serbisë, ashtu siç kanë njoftuar mjetet serbe të informimit.

Incidenti i sotëm pason atë të një dite më parë, në lagjen Kodra e Minatorëve, në veri të qytetit, kur në oborrin e shtëpisë së një pronari shqiptar është hedhur një mjet shpërthyes.

Zëdhënësi i policisë tha se në të dyja rastet nuk ka pasur të lënduar dhe nuk dihen as autorët e këtyre veprave.