Blatter, i kënaqur me botërorin

Ende pa u dëgjuar bilbili i fundit, Presidenti i FIFA-s u shpreh i kënaqur me mbarëvajtjen e Kampionatit Botëror të Futbollit, Afrikë e Jugut 2010.

“Nuk ka përfunduar ende kampionati, por mund të shikoni shumë qartë një president të lumtur”, tha Joseph Blatter për mediat në Johannesburg. Sipas tij, afrikanët duhet të ndihen shumë mirë për organizimin e Kupës së Botës.

Blatter theksoi se është për të festuar fakti se cilido të jetë ekipi fitues në finale, qoftë Spanja apo Holanda do ta ngrejë kupën për herë të parë. Presidenti i FIFA-s nuk harroi pa lavdëruar protagonistët e botërorit, lojtarët, që sipas tij kanë dëshmuar lojë të ndershme dhe të drejtë.

“Statistikat tregojnë se në krahasim me kampionatet e mëparshme ka patur më pak të lënduar dhe ky është tregues i respektit, që lojtarët kanë për kundërshtarin e tyre”, nënvizoi Blatter.