Pas Canës, Galatasaray kërkon Behramin

Stamboll, 20 korrik - Mes gjigantit të futbollit turk, Galatasaray dhe shqiptarëve duket se ka lindur “dashuria”. Një gjë të tillë e konfirmon fakti se pas blerjes së Lorik Canës, klubi i njohur edhe në arenën ndërkombëtare dëshiron të afrojë në gjirin e saj një tjetër futbollist me gjak shqiptari.
Bëhet fjalë për Valon Behramin, kosovarin me pasaportë zvicerane, i cili luan në Premier League në radhët e skuadrës së West Hemit. Lajmi është bërë i njohur nga disa media turke, por edhe nga ato angleze. Drejtuesit e klubit turk, pasi kanë testuar situatën, kanë hedhur në tavolinë dhe një ofertë në blerjen e mesfushorit kosovar, e cila shkon deri në 8 milionë euro.
Por për ta realizuar këtë objektiv të tyre, ata do të duhet të mundin konkurrencën e fortë, që po shfaqin gjermanët e Schalkes, të cilët kanë ofruar të njëjtën shifër.
Gjithsesi në ditët në vazhdim pritet të ketë edhe tratativa të tjera, pasi Galatasaray duket shumë i bindur në kërkim të Behramit, pasi e shikon atë si një përforcim të nevojshëm për të ndërtuar një skuadër fituese jo vetëm në kampionatin turk, por edhe në Kupat e Evropës.
Nëse do të pranojë ofertën e Galatasaray, ai do të bëhet kosovari i dytë në ekipin elitar turk, bashkë me Lorik Canën, i cili u transferua në një mënyrë të bujshme vetëm pak javë te ky klub ambicioz. Loriku aktualisht po synon integrimin në radhët e skuadrës së tij të re dhe sipas komenteve të shtypit turk, falë paraqitjeve të mira në ndeshjet miqësore gjatë kësaj periudhe, ai tashmë e ka fituar një vend në 11-shen titullare. Dje është mësuar se Canës nuk i është dhënë numri i shumë dëshiruar, 19, pasi ai tashmë i ka shkuar Kjuellit. Por mbi shpinë në sezonin e ardhshëm turk, mesfushori i Kombëtares shqiptare do të mbajë numrin 7.