FSK-ja plotëson radhët me rekrutë të stërvitur

Ferizaj, 26 korrik - Të hënën, në kazermën e FSK-së në Ferizaj është mbajtur ceremonia e certifikimit të rekrutëve të gjeneratës së parë për vitin 2010, të cilët për tetë javë kanë kryer stërvitjet bazike tek Komanda e Doktrinës dhe Stërvitjes, duke u aftësuar në shumë aspekte ushtarake për të qenë pjesëtarë të denjë të FSK-së. Gjenerali Enver Sekaqi, komandanti Sylejman Selimi me kënaqësi informonin
mysafirët e pranishëm, prindërit e rekrutëve, se kjo gjeneratë kishte përballuar me sukses të plotë përgatitjet, duke u kalitur si në aspektin fizik ashtu edhe në atë psikik dhe taktik, për t'i shërbyer atdheut me devotshmëri. Nga 206 veta, sa kishin nisur stërvitjet, kishin arritur t'i kalojnë me sukses testet 184 sish, nga të cilët 55 pjesëtarë të komuniteteve, që këtë gjeneratë të rekrutëve e bën shumë domethënës për rritjen dhe forcimin e FSK-së. Edhe ministri Fehmi Mujota ndjehej i lumtur që këta rekrutë po shënonin shkollimin e radhës së kuadrove të FSK-së, të trajnuar dhe të edukuar sipas standardeve te NATO-s.
Komandanti i forcave të KFOR-it në Kosovë, gjenerali Mark Bentler, i uroi rekrutët e rinj të dalluar, në gjuhën shqipe, derisa ua shtrëngonte duart ushtarakisht. Shumë familjarë shprehnin emocione të papërmbajtura derisa shihnin djemtë e tyre në uniformën e re të FSK-së, të kalitur dhe të mësuar për të mbrojtur atdheun. "Edhe vetë jam pjesëtar i FSK-së, por sot jam këtu që ta shoh vëllain tim Shefkiun, tek
kualifikohet. Jemi përcaktuar së bashku për FSK-në, sepse e duam atdheun, ndërkaq mos të harrojnë të rinjtë se është edhe mundësi e madhe për karrierë profesionale", shprehej Nazmi Latifi nga Podujeva. Kurse për Taulant Hetemin (18) , nga Skënderaj, këto çaste e mbushnin plot krenari dhe shpresë për të ardhmen. "Dua të jem në shërbim të atdheut sot e përjetë, po ta kisha këtë përgatitje gjatë luftës dhe po
t'i kisha këta shokë sigurisht se do të ishim më të fortë kundër pushtuesit", flet Taulanti, duke kujtuar ditët e rënda të luftës dhe duke shprehur sigurinë për tëardhmen.
Kjo është gjenerata e tretë me radhë e nxjerrjes së kuadrove të FSK-së, ndërkaq gjenerata e katërt pritet që në vjeshtë t'i përfundojë trajnimet.