Ibrahimoviqi lavdëron Bajramin

Stokholm, 11 gusht - Kapiteni i Përfaqësueses së Suedisë, Zlatan Ibrahimoviqi ka lavdëruar mesfushorin kosovar Emir Bajrami para ndeshjes miqësore kundër Skocisë, shkruan të martën gazeta suedeze "Expressen". Ibrahimoviqi në konferencën para ndeshjes, që luhet të mërkurën mbrëma në Stockholm, është pyetur për futbollistët e rinj që seleksionuesi Erik Hamren i ka ftuar në Përfaqësuese. Përgjigjja e Ibrahimoviqit ishte se këta futbollistë janë shumë interesantë, ndërsa mesfushori i Twentes, Emir Bajrami, ka diçka më shumë se të tjerët.
"Kemi shumë futbollistë të rinj dhe kjo është gjë e mirë, tash atyre u mbetet të tregojnë vlerat e veta. Të gjithë kanë karakteristikat e veta, por Bajrami është diçka më i veçantë", ka deklaruar Ibra. "Si kapiten e kam për obligim të luaj lojën time dhe të mundohem t'u ndihmoj këtyre të rinjve".
Vetë Bajrami prejse është ftuar në përfaqësuese nuk ka "hequr nga goja" Ibrahimoviqin sa herë ka folur për media. Ai ka treguar se sulmuesi i Barcelonës është idhulli i tij më i madh. Po ashtu, Bajrami është ndier mirë që e Ibrahimoviqi e ka lavdëruar.
"Është diçka fantastike që ai ka përmendur emrin tim, jam i nderuar. Të gjithë jemi rritur duke e pasur Ibrahimoviqin idhull, ndërsa tash është diçka e mrekullueshme të jem në ekip me të", është shprehur Bajrami. "Kur flet ai, të gjithë e dëgjojnë. Thjesht është lider i vërtetë".
Bajrami për ekipin e Suedisë deri tani ka zhvilluar tri ndeshje.