“Shpija 2” fillon më 26 nëntor, aplikimet deri më 15 tetor

Ekipi i edicionit të dytë të “reality show” “Shpija 2”, tashmë është mobilizuar që të nisë turneun medial nëpër qytetet më të mëdha të Kosovës. Qëllimi i këtij turneu, i cili do të nisë së shpejti, është që kandidatët të cilët duan të bëhen banorë të shtëpisë më të madhe në Kosovë të njoftohen për së afërmi me të gjitha risitë, rregullat dhe gjithçka tjetër që ofron “Shpija 2”. Sa i përket turneut medial të “reality show”, organizatori Genc Dobroshi ka qenë ai që ka dhënë më shumë detaje.
“Është fjala për një turne medial, qëllimi i të cilit është kontakti i drejtpërdrejtë me konkurrentët potencialë, si dhe informimi i drejtpërdrejtë për ndryshimet, përparësitë dhe shpërblimet e shumta që do të ofrohen në ‘Shpija 2’”, ka thënë Dobroshi. Po ashtu, ai ka shtuar se në këtë turne medial do të ketë hapësirë edhe për interaktivitet me qytetarët.
“Janë shumë interesante komentet, reagimet dhe këshillat që na japin qytetarët gjatë kohës kur ne bëjmë intervista”, ka thënë Dobroshi. “I ftoj të gjithë qytetarët që të shikojnë emisionin ‘Express’ të KTV-së që të informohen rreth datës, orarit dhe vendndodhjes së paraqitjes së ekipit tonë”, ka shtuar ai. Me këtë rast, Dobroshi ka zbuluar edhe ecurinë e konkurrimit për “Shpija 2”, duke potencuar interesimin e madh të kandidatëve për t’u bërë pjesë e kësaj aventure.
“Interesimi i kandidatëve është shumë i madh, por ky turne medial po bëhet për shkak se është një numër i aplikantëve potencialë që hezitojnë të konkurrojnë për arsye të ndryshme”, ka thënë Dobroshi.
Ata që duan të bëhen pjesë e "Shpija 2" kanë kohë deri më 15 tetor që të klikojnë në www.koha.net dhe të plotësojnë formularin për aplikim. Duke nisur nga data 26 nëntor, adhuruesit e këtij "reality show" do të kenë mundësi të përcjellin për së afërmi secilën lëvizje të banorëve, në kanalin e veçantë të rezervuar enkas për "Shpija 2".
Për transmetimin 24 orësh ekskluziviteti i takon rrjetit kabllor "Kujtesa". Aventurat e banorëve do të pasqyrohen edhe në ekranin e KTV-së. Nga e hëna deri të enjten do të transmetohet përmbledhja ditore e ngjarjeve më interesante. Ndërsa mbrëmja e së premtes është e rezervuar për spektaklin, në të cilin do të eliminohen banorët.