Mediat katalanase: Gjyqtari Rizzoli, mik i Mourinhos

Gjyqtari italian Nicola Rizzoli, “mik i Mourinhos”, është fajtori kryesor i humbjes së Barcelonës përballë Arsenalit të mërkurën mbrëma, sipas shtypit sportiv katalanas. Akuzat në drejtim të “bilbilit” italian vijnë sidomos nga dy të përditshmet sportive pranë Barcelonës, “El Mundo Deportivo” dhe “Sport”. Të dyja gazetat, në edicionet përkatëse online, nuk i kursejnë komentet e hidhura dhe dyshuese ndaj gjykimit.

“Miku i Mourinhos fishkëlleu kundër Barçës”, titulli i “Sport”, ndërkohë që “Vjedhje nga italiani Rizzoli, mik i Mourinhos” është zgjedhja editoriale e “Mundo Deportivo-s”.

Sipas gazetave, miqësia mes Rizzolit dhe “Specialit” vërtetohet nga “një penallti e paqenë, e dhënë nga gjyqtari për Interin ndaj Romës në mars 2009 (3-3)”, si dhe nga deklarata e vetë trajnerit portugez në drejtim të arbitrit: “E kam mik”.

Sa i përket sfidës së Championsit mes Arsenalit dhe Barcelonës, momentet e kontestuara janë: një gol i Messit i anuluar padrejtësisht, mospërjashtimi i Song për “Topçinjtë” dhe penalltia e padhënë për Barçën, pas ndërhyrjes së mbrojtësit Koscielny ndaj Pedros.

“Shpresojmë që ky gjyqtar të mos dalë më përpara në rrugën e Barcelonës”, e mbyll “Sport”.