1 shekull burg për vëllezërit Kiçina e Ramadani

Burim e Arsim Ramadani dhe Arben e Blerim Kiçina përfundimisht do të mbesin në burg një shekull.Gjykata Supreme e Kosovës ka hedhur poshtë edhe ankesën e fundit të palës mbrojtëse, që kishte të bënte me mbrojtjen e ligjshmërisë. Një kolegj gjyqësor i udhëhequr nga gjyqtari i EULEX-it, Martti Harsia, ka konstatuar se pretendimet e mbrojtjes janë të pabaza dhe se aktgjykimet e mëhershme janë të bazuara në fakte e prova. Burim Ramadani, Arsim Ramadani, Arben Kiçina dhe Blerim Kiçina janë dënuar me 100 vjet burgim për vrasjen e Hamëz Hajrës në vitin 2001 dhe tre anëtarëve të familjes së tij.



“Duke vendosur rreth kërkesave për mbrojtje të ligjshmërisë, të paraqitura nga avokatët mbrojtës kundër aktgjykimit të Gjykatës së Qarkut të Gjilanit të datës 07. 04. 2005, kundër aktgjykimit të Gjykatës Supreme të Kosovës të datës 20. 05. 2008 dhe kundër aktgjykimit të Gjykatës Supreme të Kosovës të 16. 09. 2009, Gjykata Supreme e Kosovës refuzon kërkesën e mbrojtjes për mbrojtje të ligjshmërisë si të pabazë dhe për vërtetimin e aktgjykimit të Gjykatës Supreme të Kosovës të nxjerrë në shkallën e dytë, e cila është vërtetuar nga shkalla e tretë”, thuhet në arsyetimin e Gjykatës Supreme të Kosovës.



Më 20 gusht 2001 janë vrarë Hamëz Hajra, gruaja e tij Miradija, djali Xhevdeti dhe vajzat e tij Mimoza dhe Adelina ndërmjet fshatrave Baicë dhe Tërstenik të Drenasit teksa po ktheheshin nga një dasmë për në shtëpinë e tyre në Drenas. Posa vetura po kalonte mbi një urë të vjetër prej druri, e mbijetuara e vetme Pranvera, vajza e Hamëz Hajrës, kishte dëgjuar një zë duke thirrur në shqip: ndal, për të pasuar disa breshëri armësh mbi veturë. Të gjithë kishin vdekur si pasojë e plagëve, përpos Pranverës.