Kuçi nderohet me titullin “Doctor Honoris Causa”

Universiteti i Bozokut në Yozgat të Ankaras, të enjten e ka nderuar zëvendëskryeministrin, njëherësh ministër i Drejtësisë, Hajredin Kuçi, me dhënien e titullit “Doctor Honoris Causa”.
Rektorja e këtij Universiteti, Inci Varinli, duke arsyetuar ndarjen e çmimit për ministrin Kuçi, theksoi kontributin e tij në fushën akademike dhe universitare, në kontributin për paqen dhe stabilitetin në Kosovë dhe më gjerë, si dhe në zhvillimin ekonomik.

Po ashtu, rektorja Varinli përmendi edhe faktin se Kuçi ka marrë dije në Turqi gjatë studimeve të tija post-diplomike dhe kjo gjë tha se e bën të ndihet me krenare, për ndarjen e këtij çmimi.

Ndërsa, ministri Hajredin Kuçi pasi mori çmimin, tha së ndihet jashtëzakonisht i nderuar që është laureat i këtij titulli të lartë akademik, duke e vlerësuar si nder për të, familjen e tij, Universitetin e Prishtinës, Kosovën dhe gjithë shqiptarët.

“Laurimi që po me bëhet sot nga Universiteti Juaj, me bënë edhe më fisnik dhe të përgjegjshëm në jetë dhe me shtyn që edhe më shumë të punojë për dije e nder dhe që këto t’i bart me kujdes tek të tjerët, por edhe t’i shfrytëzojë për të mirën e vendit dhe popullit tim, të miqësisë tone, shqiptaro-turke, por edhe të mirën e njerëzimit në tërësi”, tha ai.