Videofesti sonte mbledh yjet e estradës në TK

Sonte në Teatrin Kombëtar të Kosovës zhvillohet njëra prej ngjarjeve të pakta muzikore në Kosovë që mbledh yjet më të mëdha të estradës muzikore shqiptare, “Videofesti Muzikor 2011”.
Ky organizim këtë vit vjen me disa ndryshime, duke qenë në radhë të parë më transparent në përzgjedhjen e nominimeve. Fituesit e “VideoFestit” të sivjetmë nuk do të zgjidhen nga ndonjë juri e përbërë nga artistë ose figura vendore, por nga një kompani e specializuar britanike.
Për përzgjedhjen definitive të spoteve të nominuara në të gjitha kategoritë, sikurse me vonë edhe shpalljen e fituesve, këtë vit përkujdeset produksioni “US3 Production” nga Londra në krye me drejtorin menaxhues Ashley Cowen.
Fituese e vitit të kaluar e “Videofestit Muzikor 2010” ishte këngëtarja Dafina Zeqiri me këngën “Amazing Girl”.
"Videofesti Muzikor" fillon në ora 20.00 dhe do të transmetohet drejtpërdrejt në valët e Kohavizion.