GRIPI I DERRAVE MBËRRIN NË KOSOVË

Instituti Kombëtar i Shëndetit Publik të Kosovës ka identifikuar tre raste, pa shenja klinike, të gripit A H1N1. Lajmin e bëri të ditur epidemiologu Isuf Dedushaj, ndërsa e konfirmoi edhe Ministria e Shëndetësisë së Kosovës.

RTK raporton se personat e dyshimtë, si të prekur nga virusi A H1N1, ishin duke udhëtuar jashtë shtetit të Kosovës dhe se autoritetet e atjeshme i kanë kthyer për trajtim në Kosovë. Drejtori i Departamentit për Komunikim në Ministrinë Shëndetësisë, Faik Hoti, tha se në aspektin klinik- epidemiologjik rastet janë përpunuar dhe janë marrë mostrat për verifikimet të cilat sot, përmes Organizatës Botërore të Shëndetësisë janë dërguar në laboratorët përkatës.

Zyrtarët rekomandojnë që në pikat kufitare dhe në aeroport të kujdestarojnë inspektorët sanitarë, ndërsa nga qytetarët që të jenë të kujdesshëm dhe të sillen sipas rekomandimeve të mjekëve.