Tekstet e Rozanës të bazuara në përjetimet e saj

nga **MrFresh** Sun Oct 25, 2009 10:46 am

Rozana Radi, e cila ka shkruar pjesën më të madhe të teksteve për hitet e saja të fundit, thotë se e fshehta e këtyre teksteve është se ato janë të frymëzuar nga jeta reale e saj dhe se historitë e saj të dashurisë i prezanton me këngë.
“Janë histori reale, të përjetuara nga vetë unë. Janë të ndiera, të jetuara dhe më pas të hedhura në fletë pentagrami. Ndoshta, kjo është një mënyrë e mirë për t'i kujtuar e për t'i mbajtur mend...”, citohet Rozana nga Shekulli.

Këngëtares dhe aktores këto ditë i ka ndodhur diçka e pazakontë në Tiranë: një biznesmen, i cili pasi e kishte dëgjuar këngëtaren në një lokal, ka gjetur momentin e përshtatshëm për ta befasuar. Ai nëpërmjet kamerierit të klubit i ka dërguar Rozanës një unazë- një propozim fejese.

“Një person që momentalisht gjendet mes jush në këto çaste më ka dhuruar këtë unazë në këmbimi të një përgjigjeje pozitive nga ana ime. E falënderoj shumë këtë person për gjestin e tij kaq fisnik, si dhe për mendimin dhe tentativën e tij kaq serioze. Ai është një djalë që nuk e njoh nga afër, por di që ndjen diçka për mua. Unë po e marr këtë unazë me vete dhe po i kërkoj atij pak kohë për të vendosur. Tani në duar kam këtë unazë të bukur që më surprizoi dhe njëkohësisht më lumturoi, por... në zemër dhe në mendje them se kam dikë tjetër...", ka thënë Rozana në atë moment.

Sido që të jetë, Rozana thotë se ndjehet konfuze duke qenë se mendon që dashuron dikë tjetër, porse ua ka lënë dy ‘protagonistëve’ që të dëshmohen dhe do të varet nga ata se cili do t’ia fitojë zemrën.