Hedh të bijën 2 vjeçe nga ura

Shkodër, 4 dhjetor - Një ngjarje e pa zakontë ka ndodhur të premten në qytetin e Shkodrës. Një person ka hedhur nga ura mbi lum të bijën e tij 2-vjeçare.
Ngjarja ka ndodhur në afërsi të stacionit të trenit. Fatmirësisht, fëmija ka arritur të mbijetojë pasi është shpëtuar nga persona të tjerë, të cilët kanë lajmëruar policinë.
Forcat e rendit dhe ambulancat kanë mbërritur menjëherë në vendin e ngjarjes dhe e kanë transportuar fëmijën për në spital, ku është jashtë rrezikut për jetën. Si njofton edicioni on-line i gazetës Start, policia ka shpallur në kërkim autorin e kësaj ngjarje, shtetasin Eduard Xhoka.
Policia tha se Xhoka ishte i divorcuar nga bashkëshortja dhe kishte të drejtë të takonte të bijën tre herë në javë. Megjithatë, ende nuk mund të arrihet në një përfundim mbi rrethanat që e kanë shtyrë burrin për të ndërmarrë një vendim të tillë.