Dasma luksoze e Bogdanit

Në Itali, dasma e tij ka qenë një lajm dite për thuajse të gjitha rubrikat gossip, sidomos përsa i përket madhështisë së dasmës që e kanë cilësuar nje dasëm si në përralla.
Erjon Bogdani të dielën i ka dhënë fund beqarisë, duke u martuar me modelen e diplomuar për jurisprudencë Rosela Ariodante.

Gazeta Shqiptare bën të ditur sot se dasma ka qenë vërtetë përrallore dhe për këtë çifti italo-shqiptar, mes Napolit dhe Salernos ka prenotuar rreth 70 dhoma hoteli për shokët e skuadrës se Kievos, por edhe për 100 persona që kishin shkuar nga Shqipëria me një avion privat. Ceremonia është zhvilluar në Kishën Sant’Anna të San Lorencos, në Salerno kurse darka më pas është zhvilluar në Villa Roça Matilde në Napoli, në rrugën Posillipo, një restorant tepër luksoz.

Në çmimet e publikuara në internet nga ky restorant, 9 mijë euro paguhen vetëm për prenotimin, ndërsa darka kushton 120 euro personi. Duke parë se Bogdani ka ftuar në këtë mbrëmje 250 miq e të afërm, kostoja vetëm e darkës në Napoli atij i ka shkuar në 39 mijë euro në total, një shumë që natyrisht nuk është asgjë duke parë pagesën e lartë të futbollistit kuqezi.

Por, duke shtuar këtu edhe 70 dhomat e hotelit, dasma e sulmuesit kuqezi kap shifra vërtetë të çmendura. Erjon Bogdani dhe Rosela Ariodante janë njohur kur sulmuesi i kombëtares shqiptare luante për Salernitanën dhe që atëherë nuk janë ndarë më.