Hiri vullkanik, anulohen mbi 500 fluturime

Si pasojë e reve të hirit vullkanik nga shpërthimi i vullkanit Grimshvotn në Islandë, janë anuluar qindra fluturime në disa pjesë të Evropës. Agjencia evropiane e trafikut ajror njoftoi të martën se janë anuluar mbi 500 fluturime, ndërsa retë lëvizin në hapësirën ajrore të Britanisë.
Disa shoqëri ajrore ndërprenë fluturimet e tyre mes Skocisë dhe Anglisë veriore. Zyra Meterologjike e Islandës njoftoi se vullkani që shtrihet nën akullnajën më të madhe të ishullit, vazhdon të lëshojë tym në ajër, deri nëntë kilometra larg.
Hiri vullkanik i ardhur nga vullkani Grimsvotn e ka detyruar edhe presidentin Obama, i cili gjendet në një turne evropian, të ndryshojë planet e udhëtimit, duke arritur një ditë më herët në Britani.
Ekspertët, megjithatë thonë se gjasat janë fare të vogla nga përsëritja e kaosit të trafikur ajror të vitit të kaluar, ku me miliona udhëtarë humbën fluturimet si pasojë e shpërthimit të një vullkani tjetër të Islandës.