Një javë pas Big Brother

Vetëm një javë pas përfundimit të spektaklit më popullor në Shqipëri, "Big Brother Albania 2", banorët e shtëpisë më të famshme në vend, u mblodhën përsëri në një tjetër natë befasish në Top Channel.
Të gjithë së bashku treguan të pathënat deri tani, nga bashkëjetesa e tyre tre mujore.

Gjatë spektaklit të mbrëmshëm pati befasi, por edhe debate mes banorëve, që patën si shkas zbulimin e prapaskenave të përmbledhura në klipe të ndryshme që shkaktuan edhe reagimet e tyre.

Debati që e rriti paksa ‘temperaturën’ e mbrëmjes së të premtes ishte ai rreth puthjeve të Adelaides dhe Bjordit si dhe deklarimet që konkurrentet kishin bëre për njeri-tjetrin në gazeta të ndryshme gjatë intervistave të tyre.

Ndërkaq, ish-banorët e shtëpisë më të famshme treguan edhe se si po shkojnë marrëdhëniet e tyre jashtë saj.

Anjeza dhe Arjoni pranuan se marrëdhënia e tyre nuk është tashmë njësoj duke lënë të kuptohet se ata nuk janë më bashkë.

Megjithatë të gjithë dukeshin të kënaqur nga kjo eksperiencë ndonëse kishin edhe rezervat e tyre për jetën së bashku në shtëpi.

Në fund u ndanë edhe dhurata. Qetsori përveç çekut prej 50.000 eurosh që mori javën e kaluar, iu dorëzuan edhe çelësat e një mazde kabriolet.

Adelaida fitoi një biletë për të parë një nga garat e Formula 1 dhë të gjithë së bashku do të bëjnë një udhëtim turistik nëpër qytetet kryesore të vendit dhe turi i tyre do të përfundojë në Prishtinë.