Të gjitha rrugët janë të kalueshme

Të gjitha rrugët në të gjithë vendin janë të kalueshme, duke i përfshirë edhe të gjitha vendkalimet kufitare. Mirëpo gjatë natës dhe në orët e hershme të mëngjesit trafiku është zhvilluar me vështirësi për shkak të të reshurave të borës dhe ngricave.
Zëdhënësi i policisë së Kosovës Baki Kelani tha se të gjitha rrugët rajonale janë të kalueshme, por reshjet e borës dhe temperaturat e ulëta kanë vështirësuar qarkullimin në trafik.
Ndërsa ai tërhoqi vërejtjen për shtimin e kujdesit të ngasësve të automjeteve, sidomos automjeteve të rënda, në rrugët rajonale, Prishtinë- Prizren dhe në vendkalimin kufitar Kullë-Rozhajë.
Kelani, përsëritë thirrjen për ngasësit që të iu përshtaten kushteve të rrugës dhe të mos dalin pa pajisje të nevojshme dimërore.
Ndërkaq zëdhënësi i MTI Xhevdet Pozhari tha se MTI ka kontraktuar 10 kompani për mirëmbajtjen e rrugëve.
Sipas Institutit Hiderometeorologjik të Kosovës mot i ngjashëm do të mbajë edhe në ditët në vijim. Drejtori Sylë Tahirsylaj tha se përveç reshjeve të borës në ditët në vijim do të ketë edhe intervale me diell, por temperaturat do të zbresin deri në minus 13 gradë celsius.
Si pasojë e reshjeve të borës dhe ngricave gjatë 24 orëve të fundit janë shënuar disa aksidente, ku tre persona janë lënduar, ndërsa në 23 aksidente, janë shkaktuar vetëm dëme materiale. /rtk/