Historia do ta njohë Messin si më të mirin e të gjitha kohërave

Legjenda e Tottenhamit dhe fituesi i Kupës së Botës, Ossie Ardiles, beson se emri i Lionel Messit do të shkruhet në histori si futbollisti më i mirë i të gjitha kohërave.
Argjentinasi 58-vjeçar, i cili ishte pjesë e përfaqësues së Argjentinës e cila në vitin 1978 e fitoi Kampionatin Botëror, kishte menduar se asnjëherë nuk do të tejkaloheshin yje të tilla si Diego Maradona dhe Pele, mirëpo tash mendon ndryshe.

“Tash mund të them se Lionel Messi do të njihet në histori si futbollisti numër një i të gjitha kohërave, më i miri që ka jetuar ndonjëherë”.

“Mendoj se është vetëm një lojtar që mund të krahasohet me Messin dhe ai është Maradona, dhe në shumë mënyra ata janë të ngjashëm”, ka thënë Ardiles.

Forcën e 23-vjeçarit ai e shpjegon me faktin se Pele ka kaluar karrierën në Brazil, ndërsa Maradona ka luajtur në Argjentinë dhe Itali. Kurse Messi është gjithmonë nën presion dhe nga ai kërkohet vazhdimisht nivel i lartë i lojës, sidomos në një garë siç është Liga e Kampionëve.