Serbia humb Kosovën nëse atë e njohin Rusia dhe Kina

Nëse Rusia dhe Kina do ta njihnin pavarësinë e Kosovës, atëherë Serbia do të mund të konsideronte se e ka humbur përfundimisht këtë territor, ka deklaruar eksperti nga Instituti Brookings në Washington, Igor Danchenko.
Danchenko, në një intervistë për radion Evropa e Lirë, ka thënë se njohja eventuale e Kosovës nga këto dy shtete me ndikim, do të thoshte se Serbia e ka humbur Kosovën edhe në planin diplomatik.

I pyetur nëse Moska zyrtare do të mund të rishqyrtonte pozicionin e saj lidhur me njohjen e pavarësisë së Kosovës – nëse Serbia do të vendoste të anëtarësohej në NATO, Danchenko ka thënë se Rusia kundërshton zgjerimin e Aleancës dhe ka propozuar një platformë të re evropiane të sigurisë.

"Rusia shpreson që Serbia, në vend të anëtarësimit në NATO, do të mbështesë propozimin rus për një sistem të ri evropian të sigurisë. Megjithatë, kjo është një rrethanë fatkeqe për Serbinë, ngase Kosova do të mund të shfrytëzohej si atu politike, me të cilën ndaj saj do të mund të ushtrohej trysni”, ka thënë ai.