Merr fund debutimi për Sllovakinë

Për herë të parë, Sllovakia mori pjesë në një botëror si shtet më vete dhe largohet kokëlartë, pasi arriti të dalë nga faza e grupeve me fitoren e fundit 3-2 ndaj Italisë kampione. Hovi i sllovakëve u ndal nga Holanda, e cila fitoi me superioritet 2-1, duke i dhuruar vetes biletën për në çerekfinale.

Skuadra holandeze kaloi në avantazh në minutën ’18. Arjen Robben shënoi në portën sllovake, pasi mori një pasim të shkëlqyer nga Wesley Sneijder. Prania e Sllovakisë në fushë ndihet nga Vladimir Weiss dhe Marek Hamsik, që tentojnë të depërtojnë mbrojtjen holandeze, por pa mundur të shënojnë. Në minutën ’84, Wesley Sneijder realizon golin e dytë për Holandën.

Kur dukej se loja kishte përfunduar, portieri holandez Maarten Stekelenburg shkakton një faull në minutat e fundit të kohës shtesë dhe Robert Vittek shënon golin e nderit për Sllovakinë.

Kjo është fitorja e katërt e Holandës në Botërorin 2010. Në çerekfinale, skuadra “portokalli” pritet të ndeshet me Brazilin ose Kilin.