Oktapodit Paul i ofrohet një punë si bastvënës

Moskë, 20 korrik - Oktapodit telepatik Paul i është ofruar një punë e re - si bastevënës, përcjellin mediumet e huaja të hënën. Oktapodit të akuariumit "Sea-Life" në Oberhausen i është ofruar puna nga një kompani e basteve nga Rusia e njohur me emrin "Bet-League". Atij i është ofruar pagë prej 5000 dollarësh në muaj dhe akuariumit "Sea-Life" një dëmshpërblim prej 100 mijë eurosh.

"Oktapodi do të ishte njëri prej 120 punëtorëve tanë. Specialistët tanë fitojnë nga 3000 dollarë në muaj. Ndërsa Paul do të fitonte 5000 dollarë", ka thënë Oleg Zurawski, njëri prej bashkëpronarëve të bastores, përcjellin mediumet ruse.

Oktapodi Paul u bë i famshëm gjatë Botërorit 2010 të futbollit duke i parashikuar saktë të shtatë ndeshjet e Gjermanisë në Botëror si dhe fituesin e finales mes Spanjës dhe Holandës. Oktapodi madje kishte parashikuar edhe humbjen befasuese të Gjermanisë në fazën grupore kundër Serbisë. Ai zgjidhte fituesin duke u përcaktuar për njërën nga kutitë e mbushura me ushqim. Dy kuti vendoseshin me flamuj të skuadrave.

Pas përfundimit të Botërorit ofertat për oktapodin telepatik ishin të mëdha. Madje një biznesmen rus kishte ofruar 500 mijë euro për Paulin. Por, akuariumi në Oberhausen nuk e ka ndërmend të shesë oktapodin telepatik.