Werder Bremen nuk e shet Oezilin

Bremen, 16 gusht - Ekipi gjerman i Werder Bremenit ka përsëritur se mesfushori Mesut Oezil do të qëndrojë tek ky ekip, pavarësisht interesit të treguar nga Real Madridi.
Mediat spanjolle kanë raportuar se Reali ishte i gatshëm të ofronte 14 milionë euro për futbollistin 21 vjeçar, ose pesë milionë më shumë se ç'kishte ofruar më parë.
Gazetat gjermane kishin njoftuar se për mesfushorin e talentuar Oezil kërkoheshin 16 milionë euro. Kontrata e tij me ekipin e Bremenit përfundon në qershor të vitit 2011.
Mësohet se dhe dy klubet angleze, Arsenali dhe Manchester United po e ndjekin situatën nga afër.
Oezil iu bashkua Werder Bremen në janarin e vitit 2008 për 4.25 milionë euro, por vlera e tij u rrit pas lojërave shumë të mira gjatë kampionatit botëror të futbollit, Afrika e Jugut 2010.