Njohje të reja po vijnë nga Afrika e Lindja e Mesme

Kosovën së shpejti pritet ta njohin vende nga kontinente dhe rajone të ndryshme të botës. Ky premtim vjen nga Presidenti i Kosovës, Behgjet Pacolli.

Ai, gjatë një takimi që pati të hënën me kryetaren e KQZ-së, Valdete Daka, deklaroi se mungesa e njohjeve të reja gjatë kësaj kohe, ka qenë për shkak të një vakuumi institucional. Por pavarësisht kësaj, Pacolli tha se “edhe gjatë asaj kohe, ka pasur njohje të shtetësisë së Kosovës”.

Ai ka theksuar se me ministrin e Punëve të Jashtme, Enver Hoxhaj, do të zbatohet një program që përshpejton procesin e njohjeve, ndërsa ka theksuar se ekipet e tij lobuese ende janë duke punuar në këtë drejtim, duke mos hezituar të përmend edhe kontinentet dhe rajonet prej nga pritet të vijnë njohjet e reja.

“Tani bashkë me ministrin e Punëve të Jashtme kemi biseduar, do të bisedojmë prapë për implementimin e një programit diplomatik, që e kemi në definim e sipër, program ky që do të jetë shumë inovativ dhe besoj se do të përshpejton arritjen e njohjeve”, u shpreh Presidenti Pacolli.