X-Zibit, biletat në shitje, pritjet të mëdha

Kanë mbetur më pak se dy javë para koncertit të madh të reperit të njohur amerikan X-Zibit, që do të mbahet në sallën 1 tetori në Prishtinë, ndërsa tashmë biletat janë në shitje dhe pritjet për këtë koncert janë tejet të mëdha.
Koncerti që organizohet nga NextLevel do të mbledhë mijëra të rinj kosovar në ambientin e mbyllur të sallës 1 Tetori për të pritur krijuesin e hiteve ‘’What’s The Difference’’, ‘’Phenom’’, ‘’Multiply’’, ‘’What It Is ‘’ dhe shumë e shumë të tjerë.

Momentalisht X-Zibit dhe ekipi i tij gjendet në Paris, ku po qëndron në kuadër të turneut të tij të madh evropian, e ku bën pjesë edhe Prishtina – një ngjarje të cilën ai e ka publikuar në faqet e tij zyrtare, duke u shprehur se e pret me pa durim eventin, pasi ka shumë miq në Kosovë.

Në çdo koncert të tij ai ka performuar për së paku një orë, varësisht nga atmosfera dhe kështu pritet të ndodhë edhe në Kosovë, ku ai do të ketë edhe mbështetjen e artistëve vendas. Të gjitha biletat në koncertet e tij të turneut evropian janë të shitura, një gjë që pritet të ndodhë edhe për atë në Kosovë.

Kjo nuk është e tëra. Telegrafi ka mësuar se X-Zibit edhe pas koncertit do të qëndrojë për të vizituar pjesë të tjera të Kosovës, ku dhe do të japë prononcimet për mediat rreth albumit të tij të ri, pjesë të të cilit do t’i performojë edhe në Prishtinë.

Biletat normale kushtojnë 10 euro, përderisa për një vend pranë skenës së koncertit fansat duhet të paguajnë 15 euro. Këto bileta ata mund t’i gjejnë në lokalet Annex, Prive, Che Bar, Blue Sky, Shekulli (Gjakovë) dhe Mango (Ferizaj).