SHBA-të të përkushtuara për aspiratat e Kosovës

Presidenti Sejdiu, me rastin e përvjetorit të dytë të pavarësisë së Kosovës, ka marrë një mesazh urimi nga Presidenti i Shteteve të Bashkuara të Amerikës, Barack Obama.
“Në emër të popullit amerikan, unë ju përgëzoj Ju dhe qytetarët e Kosovës në përvjetorin e dytë të pavarësisë së Kosovës më 17 shkurt. Unë gjithashtu dëshiroj të përgëzoj popullin e Kosovës për përparimin që keni bërë në ndërtimin e një shteti demokratik, paqësor dhe multietnik”, thuhet në urim.
Më tutje, në urim shkruan se SHBA-të vlerësojnë partneritetin ndërmjet dy vendeve dhe se mbeten të përkushtuara për ta mbështetur Kosovën në hapat e nevojshëm për të arritur aspiratat euroatlantike.
Presidenti i SHBA-ve ka shprehur bindjen dhe besimin e tij për vazhdimin e miqësisë dhe forcimin e partneritet në mes të dy vendeve.