Loew s’mund të vendosë për kapitenin e Kombëtares

Frankfurt, 11 gusht - Trajneri i Përfaqësueses së Gjermanisë, Joachim Loew do të vendosë muajin tjetër se kush do ta bartë shiritin e kapitenit në garat kualifikuese për evropianin "Euro 2012". Loew do të vendosë për shiritin e kapitenit mes kapitenit të vjetër Michael Ballack dhe kapitenit të Botërorit 2010, Philipp Lahm.
Ballack ishte kapiten i Gjermanisë derisa u lëndua, e që e la jashtë Botërorit të zhvilluar në Afrikën e Jugut. Në mungesë të tij, Lahm barti shiritin e kapitenit dhe ndihmoi ekipin të fitojë medaljen e bronztë. Por, ende pa përfunduar kjo garë, Lahm ndezi luftën me Ballackun duke thënë se nuk do t'ia japë shiritin e kapitenit askujt. Reagimi i Ballackut ishte i menjëhershëm. Madje mediat kishin raportuar se ka pasur një konflikt verbal mes tyre në Afrikë të Jugut, ku Ballack ishte i pranishëm me kombëtaren gjermane.
Për të shuar pakënaqësitë deri në marrjen e një vendimi përfundimtar, seleksionuesi Loew nuk ka ftuar asnjërin nga dy kapitenët për miqësoren me Danimarkën, që luhet të mërkurën.
"Kjo do të ngjallte debate në media dhe në ekip. Nuk kam asgjë të them në këtë drejtim, sepse kjo nuk ka të bëjë asgjë me përfaqësuesen gjermane aktualisht", ka thënë Loew.
Ndonëse Loew nuk ka ftuar asnjërin nga kapitenët e tij në miqësore me Danimarkën, ai ka paralajmëruar se do të bisedojë me dy kapitenët muajin që vjen për të gjetur një zgjidhje mes tyre.
"Ne do të kemi diskutime serioze muajin që vjen. Do t'ua bëjë me dije se çka mendojë unë dhe do t'i dëgjojë se çka mendojnë ata dhe pastaj do të marrë një vendim", ka thënë trajneri Loew.
Eliminatorët për Euro 2012 nisin në fillim të muajit shtator.

Ja edhe lista e disa ndeshjeve më të rëndësishme e miqësoreve që luhen të mërkurën:
Rusia - Bullgaria 17:00
Finlanda - Belgjika 18:00
Suedia - Skocia 20:00
Ukraina - Holanda 20:00
Turqia - Rumania 20:15
Austria - Zvicra 20:30
Danimarka - Gjermania 20:30
Mali i Zi - Irlanda V. 20:30
Polonia - Kameruni 20:30
Sllovakia - Kroacia 20:30
Afrika e Jugut - Gana 20:35
Anglia - Hungaria 21:00
Norvegjia - Franca 21:15
Meksika - Spanja 22:00
Angola - Uruguai 22:30