Mungesa e helmit i zgjatë jetën edhe disa muaj

Mund të besoni ose jo, por një i dënuar me vdekje në SHBA ka mundur të sigurojë edhe disa muaj jetë më shumë, pasi helmi që injektohet për shkaktimin e vdekjes klinike ka skaduar.

Albert Greenwood Brown, i cili duhej të ekzekutohej në burgun e San Quentinit në Kaliforni, nuk është larguar ende nga kjo jetë, pasi helmit Pentotal i ka mbaruar data e skadencës dhe për të prodhuar serinë e re duhet pritur deri në mars të vitit 2011.

Ekzekutimi i Brownit do të ishte i pari pas pesë vjetësh. Dyshohet se Hospira, e vetmja shoqëri farmaceutike që prodhon këtë helm, tenton të pengojë ekzekutimet në Kaliforni. Kompania shpjegon se ka humbur furnizuesin e helmit dhe në treg nuk ka të tjerë.

Nga kjo vonesë nuk përfiton vetëm Brown, por edhe 708 të burgosur të tjerë në Kaliforni si dhe 17 në Virginia, Kentucky e Oklahoma.