Argjentina: Ndihem e përkëdhelur nga fama

Argjentina Ramosaj ka thënë gjatë një interviste për Telegrafi.com se ajo ndihet e përkëdhelur që është një femër e bukur dhe e famshme.
Këngëtarja e ka thënë këtë me modesti pasi, sipas saj, të jesh e bukur është dhuratë, ndërsa për të qenë e famshme duhet edhe shumë punë.

“Nuk mund të mos e pranoj që e ndjej veten të përkëdhelur nga ky fakt. Kudo që unë shkoj njerëzit më flasin, më japin komplimente, duan foto, dhe në këtë sens unë them se jam e përkëdhelur, por nga ana tjetër nuk është dhe ndonjë gjë shumë e madhe të jesh e bukur sepse është diçka që thjesht të është dhuruar”.

“Ndërsa, ajo që ti jep në karrierë, në punën tënde të bën të ndjehesh vërtetë e bukur, e kompletuar. Unë më mirë ndjehem kur më thonë se sa bukur këndova, apo kur më thonë se ke ndryshime nga sezoni në sezon dhe eksperienca jote si prezantuese sa vjen e po formohet, se sa kur më thonë se isha veshur bukur, apo sa bukur i kishe lyer sytë etj. Këto janë gjëra që tashmë nuk kanë me ndonjë rëndësi të madhe për mua”, ka thënë Ramosaj.

Argjentina e ka përshkruar vetën si një person me zemërgjerësi, besnike, por ndonjëherë edhe impulsive.

“Është pak e sikletshme të flasësh për veten në këtë mënyrë. Por, unë te vetja shoh shumë besnikëri, zemërgjerësi, një tip shumë të formuar, impulsive nganjëherë, por edhe direkte”, ka shtuar ajo.