EULEX-i, kontrollon Sabri Fejzullahun dhe Afrim Muçiqin

Këngëtari kosovar, Sabri Fejzullahu, është bastisur të hënën në mëngjes në mënyrë të hollësishme nga doganierët e EULEX-it në Aeroportin e Prishtinës, me të arritur nga Cyrihu.
Lajmin për këtë kontroll të detajuar të ish-deputetit të PDK-së, e konfirmoi për Klan Kosova, kolegu i tij nga estrada, Afrim Muçiqi.
Sipas këtij të fundit, që të dy ishin veçuar nga udhëtarët e tjerë të zakonshëm dhe pas kontrollit më të kujdesshëm, Fejzullahu ishte futur në një dhomë të veçantë për bastisje.
Muçiqi, ka mohuar të jetë në dijeni për arsyet e këtij kontrolli të posaçëm, ndërsa Klan Kosova e pati të pamundur të kontaktonte edhe Fejzullahun.
Ndryshe ky kontroll, ndodh pak ditë pas aksionit të EULEX-it për inspektimin e bagazhit të kryeministrit, Hashim Thaçi dhe katër ministrave para udhëtimit të tyre për në Turqi.