Tifozët brazilianë: Mick Jagger rri larg!

Në fillim shkoi të ndiqte ndeshjen Gana-SHBA dhe më pas Gjermani-Angli. Por nga të dyja ndeshjet, Mick Jagger doli i zhgënjyer, pasi asnjë nga skuadrat që ai mbështeti nuk fitoi.

Tani këngëtari i grupit “Rolling Stones” i ka kthyer sytë nga ndeshja tjetër Brazili-Kili, për të cilën ka një pretekst të fortë për ta ndjekur. Jagger ka një djalë, Lucas, me modelen braziliane Luciana Gimenez dhe pa dyshim që do të jetë tifoz i Brazilit.

Por tifozët brazilianë janë alarmuar, sepse sipas tyre Mick Jagger sjell “ters”. Në versionin brazilian të faqes sportive “ESPN” në internet shkruhet, “Lideri i Rolling Stones ka reputacion se sjell fat të keq në këtë botëror”. Nisur nga këto, tifozët brazilianë kanë nisur të urojnë që Jagger të mos shkojë dot në stadiumin “Ellis Park”, ku do të luhet Brazil-Kili.