SHBA: Asnjë pavarësi nuk është gjykuar për shkelje ligjesh

Washington, 19 korrik - Derisa pritet që kësaj të enjte të jepet mendimi këshillues, rreth ligjshmërisë së pavarësisë së Kosovës, i Gjykatës Ndërkombëtare të Drejtësisë në Hagë, qëndrimi amerikan ka qenë gjatë gjithë kësaj kohe se Gjykata duhet të vendosë ose në favor të Kosovës ose të përmbahet nga çfarëdo vendimi, raporton nga kryeqyteti amerikan RTK-ja.


Në argumentet që paraqitën Shtetet e Bashkuara të Amerikës në Hagë në mbrojtje të ligjshmërisë së pavarësisë ishte edhe vlerësimi se pavarësia ka avancuar lirinë dhe
stabilitetin në Ballkan .

‘Pavarësia e Kosovës nuk është një diçka që kontrollohet nga ligji ndërkombëtar’ por është ‘rrënjësisht një veprim politik… të cilin shtetet veç e veç vendosin se a do ta njohin apo jo.’

Idetë që qarkullojnë, sidomos nga pala serbe, për mundësinë e bisedimeve rreth statusit pas dhënies së mendimit këshillues, zyrtarët amerikanë i kanë quajtur të kota, sepse një orientim i tillë do të ‘shthurte marrëveshjet e mundimshme politike, të cilat kanë sjellë stabilitet në rajon.’

“Pavarësia e Kosovës”, thonë zyrtarët amerikanë, “është një realitet dhe ajo arsyetohet përballë shtypjes historike nën okupimin serb.”

Përveç kësaj, Washingtoni zyrtar argumenton se asnjë nga mbi 100 deklarata të pavarësisë anekënd botës nuk është gjykuar të ketë shkelur ligjin ndërkombëtar e këtë nuk e ka bërë as Kosova, thekson raporti i RTK-së.