Marrëveshja në xhepat e Thaçit e Pacollit

Kosova mund të bëhet me qeverinë e re që nga fillimi i javës së ardhshme. Zotime të tilla ka dhënë tashmë vetë kryeministri në largim dhe mandatari për qeverinë e re, Hashim Thaçi.

Skenari aktual është që të hënën fillimisht të konstituohet përbërja e re e Kuvendit dhe të zgjidhen kryetari dhe kryesia e re. Kurse pas një pauze të mblidhet Kryesia e re e Kuvendit dhe ta caktojë kohën e thirrjes së seancës për votimin e qeverisë. Mbetet ndërkaq diskutabile nëse në këtë seancë do të votohet edhe për presidentin.

Burime nga PDK thonë se duhet sqaruar fillimisht deri në fund nëse Jakup Krasniqi, në cilësinë e ushtruesit të detyrës së presidentit ka legjitimitet që t’i japë mandatin Hashim Thaçit për propozimin e qeverisë, apo do të duhet që fillimisht të zgjidhet presidenti i ri dhe mandati të merret nga ai. Kjo çështje, sipas këtij burimi, do të sqarohet përfundimisht të premten apo të shtunën kur edhe pritet të finalizohet marrëveshja e koalicionit.

Po ashtu, nga të njëjtat burime merret vesh se Hashim Thaçi dhe partneri i tij në koalicion Behgjet Pacolli, tashmë kanë caktuar edhe përbërjen e re të qeverisë dhe ndarjen e ministrive, por këtë ata nuk do ta bëjnë publike pa u formalizuar edhe një marrëveshje e shkruar.

Sipas versionit më të ri, kryeministri Hashim Thaçi thuhet se do t’i ketë afër vetes katër zëvendëskryeministra, dy nga PDK, Hajredin Kuçin dhe Enver Hoxhajn, si dhe Mimoza Kusari – Lila nga AKR dhe Sllobodan Petroviqin nga SLS-ja. Propozimi i mëhershëm që edhe lista Ibrahim Rugova të japë një zëvendëskryeministër, sipas këtij burimi, nuk ka kaluar dhe se dy poste të zëvendëskryeministrave do t’i mbajë për vete PDK-ja.