Një i arrestuar për sulmin në Gjakovë

Qëllohet me plumba objekti i Kuvendit Komunal të Gjakovës



Gjakovë, 24 nëntor – Ndërtesa e Kuvendit Komunal të Gjakovës ka qenë cak i plumbave, në minutat e parë të së martës, pas mesnatës.
Burime nga Kuvendi Komunal kanë thënë se plumbat e shkrepur nga personi apo personat ende të panjohur kanë shkaktuar dëme materiale.
Në vendin e ngjarjes, në mëngjesin e së martës, ishin të dukshme vrimat e plumbave që kishin depërtuar deri në zyrat e ofiçarisë, duke shpuar xhamat, dëmtuar orenditë dhe kompjuterët.
Në mëngjesin e së martës policia zyrtarisht nuk ka dhënë asnjë deklaratë rreth incidentit, derisa burimet tregojnë se pas ngjarjes, mbajtësit e rendit për tri orë kanë qëndruar në objektin e goditur me armë zjarri.
As zyrtarët e Kuvendit Komunal në mëngjes nuk kanë dhënë deklarata publike.

Aleanca për Ardhmërinë e Kosovës ka dënuar sulmin. AAK-ja ka ftuar të gjitha subjektet politike, sidomos degën e AKR-së në Gjakovë, që të distancohen nga “akti kriminal i drejtuar kundër Komunës së Gjakovës si institucion”.