Ljamet nga Sporti 04.08.2009

Tottenham nuk heq dorë nga Huntelaar




Sipas mediave angleze, Tottenhami është i gatshëm për të angazhuar sulmuesin holandez të Real Madridit, Klaas Jan Huntelaar.
Harry Redknapp nuk heq dorë nga përpjekja për të angazhuar Klaas Jan Huntelaar, i cili pritet të largohet nga klubi spanjoll këtë verë.

Darent Bent është në prag të kalimit në Sunderland, ndërsa Redknapp kërkon blerës edhe për Roman Pavlychenkon me qëllim që ta zvogëlojë konkurrencën në sulm.

Rusi është në radar të disa ekipeve, si Stuttgart, Roma dhe Besiktas. Pas angazhimit të Peter Crouch, trajneri ka në disponim edhe Jermaine Defoe dhe Robbie Keane.

Por Redknapp dëshiron të sjellë edhe Huntelaar, i cili muajin e kaluar refuzoi të kalojë në Stutgart. Por në konkurrencë për holandezin janë edhe Arsenal dhe Milan.

Voronin shpreson t’i ndihmojë Liverpoolit




Sulmuesi ukrainas Andriy Voronin është i bindur se ai do të ketë një ndikim të madh në Liverpool në sezonin e ardhshëm.
Voronin kaloi një sezon si i huazuar te Hertha Berlini, ku ishte një prej më të spikaturve në ekip, ndërsa për sezonin e ri është rikthyer te të kuqtë.

“Kam biseduar me Rafa Benitez para se të rikthehem se ai më tha se duhet të punoj shumë për të siguruar vend në formacionin e parë. Nuk kam frikë nga konkurrenca që kam këtu. Përgatitem për të luftuar për vend në ekipin e parë dhe nuk planifikoj të qëndroj në stol”, ka thënë Voronin.

“Doja të qëndroja te Hertha, nuk ka mëdyshje në këtë. Isha shumë i zhgënjyer, pasi dhashë më të mirën nga vetja. Por shpresoj të kem një sezon të shkëlqyeshëm edhe në Liverpool”, ka shtuar ukrainasi.

Chamakh afër kalimit në Arsenal



Sulmuesi i Bordeaux, Marouane Chamakh, raportohet se dje ka qëndruar në Londër për të biseduar me Arsenalin.
Sipas Daily Mail, Chamakh ka qëndruar në kryeqytetin britanik në përpjekje për të arritur marrëveshje me Arsenalin, pasi prishi raportohet me ekipin francez.

Sulmuesi nga Maroku është i tmerruar me kërkesat prej 15 milionë funtesh nga Bordeaux, pavarësisht se ka vetëm edhe një vit të mbetur nga kontrata e tij.

Arsene Wenger thuhet se është shumë i interesuar të nënshkruajë me 25-vjeçarin, por nguron të paguajë madje edhe gjysmën e kësaj shume. Oferta e tij prej 6 milionë funtesh raportohet se u refuzua javën e kaluar nga kampioni francez.

Leonardo: Milani duhet të forcohet



Trajneri i Milanit, Leonardo, edhe njëherë ka deklaruar se ekipi italian ka nevojë të fuqizohet para se afati kalimtar të mbyllet në fund të muaji.
“Afati kalimtar është i hapur deri më 31 gusht, ne e dimë se çfarë duhet të bëjmë. Ekipi tashmë është i mirë, por ka nevojë të fuqizohet”, ka thënë Leonardo.

“Ne kemi nevojë për lojtarë të tjerë për ta kompletuar ekipin. Unë besoj se është e rëndësishme të kemi edhe një sulmues dhe një mbrojtës anësor”, ka shtuar trajneri i rosonerëve.

Van der Vaart i hidhëruar me Pellegrinin



Mesfushori holandez Rafael van der Vaart nuk ka zgjidhje tjetër pos të largohet nga Real Madridi këtë verë, pasi është ‘dëbuar’ nga trajneri Manuel Pellegrini.
“Nuk kam asgjë më shumë për të thënë për Pellegrinin. Qëndrimi i tij është i qartë. Çfarë më shumë mund të pres nga ai kur që tash gjatë përgatitjeve në para-sezon kam qëndruar në stol?”, ka thënë Van der Vaart për gazetën holandeze AD.

“Për momentin jam duke u stërvitur sikur asgjë e keqe nuk ka ndodhur, por në të vërtetë gjithçka po shkon keq. Zhgënjimi im dhe humbja e shpresave janë të dukshme. Çfarë mund të them për Pellegrinin kur ai nuk dëshiron që unë të luajë as një ndeshje të vetme miqësore?”.

“Shanset e mia që të luajë në Real Madrid janë afër zeros, për të mos thënë hiç. E duhet të jemi real. Nuk kam vend në këtë ekip dhe gjëja më e mirë është të paketohem dhe largohem sa më shpejt që është e mundur”, ka shtuar ish-lojtari i Hamburgut.

Everton shpreson të transferojë Senderos



Evertoni është i bindur se do të sigurojë shërbimet e mbrojtësit të Arsenalit, Philippe Senderos, për një shumë më të ulët.
Sipas Daily Mail, menaxheri i Evertonit, David Moyes, tashmë një kohë është në ndjekje në mbrojtësit zviceran të qendrës.

Të inkurajuar nga raportet në Gjermani, se Senderos ka injoruar interesimin nga Hamburg dhe Hertha Berlin, Evertoni shpreson të arrijë të transferojë mbrojtësin për një shumë jo më të madhe se 3 milionë funte.

Në anën tjetër në largim e sipër nga Evertonit është mbrojtësi Joleon Lescott, i cili një kohë të gjatë është cak i Manchester Cityt