lajmet nga sporti me 24-10-2009

Edhe Arsenali pas Behramit



Numri i klubeve të interesuara për Valon Behrami vazhdon të rritet, me edhe Arsenalin dhe Milanin që thuhet se kanë kthyer vëmendjen kah shqiptari.
Behrami ka shkëlqyer me West Ham United që kur u zhvendos nga Lazio në verën e vitit të kaluar, dhe së fundi është lidhur me një kalim në Juventus dhe Roma.

Por në prag të takimit të Arsenalit dhe West Hamit, Daily Star raporton se garës për kosovarin me nënshtetësi zvicerane i është bashkuar edhe Arsene Wenger. Francezi e sheh Behramin si opsion të parë nëse mbrojtësi i djathtë Bacary Sagna largohet për në drejtim të Real Madridit.

Megjithatë agjenti i Behramit, Alessandro Beltrami, ka thënë se klienti i tij do të mendojë për të ardhmen vetëm pas fundit të sezonit.

Benitez ka rekord më të mirë se Ferguson


Takimi i nesërm përballë Manchester United do të jetë takim jubilar për Rafa Benitez, i cili do të drejtojë Liverpoolin për të 200-tën herë në një takim të Ligës Premier.
Në 199 ndeshjet e kaluara, Benitez ka shënuar 113 fitore, që është një mesatare prej 56.78%, edhe pse e kishte rindërtuar tërësisht ekipin kur e morri nën drejtim në 2004.

Në anën tjetër edhe menaxheri i Manchester United, Alex Ferguson, pati detyrë të ngjashme, të rinovojë ekipin, kur zëvendësoi Ron Atkinson në vitin 1986.

Megjithatë në 200 takimet e para, menaxheri i Djajve të Kuq kishte fituar vetëm 87, që është 43.5%

Shefki Kuqi i jep fitoren Koblenzit


Sulmuesi kosovar Shefki Kuqi ka qenë protagonisti i tre pikëve të reja për ekipin e Bundesliga 2, Koblenz, duke shënuar dy golat e fitores së mbrëmshme ndaj Greuther Furth, ndeshje që përfundoi me rezultat 2-1.
Të dy golat e Kuqit erdhën në pjesën e parë të ndeshjes, kur edhe u vulos dilema rreth fituesit. Goli i parë i përfaqësuesit të kombëtares së Finlandës erdhi që në fillim të takimit (4’), ndërsa vendasit arritën të barazojnë në minutën e 26-të.

Por në fund të pjesës së parë ishte sërish Kuqi heroi i Koblenzit, duke shënuar edhe golin e dytë të takimit, që i solli tri pikët e reja këtij ekipi.

Pavarësisht fitores, ekipi ku angazhohen edhe një mori shqiptarësh të tjerë, vazhdon të mbete në pjesën e fundit të tabelës, pozitën e 16-të, me vetëm nëntë pikë pas 10 ndeshjes

‘E pamundur’ që Mourinho të drejtojë Liverpoolin


Trajneri i Interit, Jose Mourinho, ka mohuar spekulimet të cilat thonë se ai mund ta zëvendësojë Rafa Benitez në stolin e Liverpoolit.
Edhe pse njëri nga bashkëpronarët, George Gillet, ka thënë se pozita e Benitez është e sigurt pavarësisht rezultateve të dobëta, vazhdojnë të përmenden disa emra si pasardhës të mundshëm të spanjollit.

Një prej tyre është edhe ish-menaxheri i Chelseat, Jose Mourinho, i cili ka tallur këtë temë gjatë konferencës së shtypit në prag të takimit të Serie A ndaj Catanias.

“Është e pamundur”, është përgjigjur shkurtazi Mourinho./

Reali planifikon 30 milionë funte për Gerrard


Mediat angleze shkruajnë se Reali i Madridit është i gatshëm të provojë qëndrueshmërinë e Liverpoolit duke bërë ofertë për kapitenin e klubit, Steven Gerrard.
Sipas The Sun, presidenti i Realit, Florentino Perez, do të dërgojë një ofertë në vlerën e 30 milionë funteve për kapitenin e të kuqve.

“Nuk është sekret se Gerrard është një lojtar të cilin Perez dhe drejtori teknik Jorge Valdano e admirojnë. Ka një listë të ngushtë për sezonin e ardhshëm dhe Gerrard është një prej tyre”, ka thënë një burim nga Madridi.

Perez tashmë ka dëmtuar ekipin e trajnerit Rafael Benitez, pasi ia morri njërin prej mesfushorëve më të mirë, Xabi Alonson, për një shumë prej 28.8 milionë funte

Suarez: Interit i mungon emri në Evropë


Legjenda e Interit, Luis Suarez- i cili ishte pjesë e ekipit zikaltër në vitet e gjashtëdhjeta që fitoi dy Kupa të Kupave të Evropës dhe dy Kupa Ndërkombëtare- thotë se Nerrazzurëve u mungon personaliteti dhe karakteri në Evropë.
“Trajneri nuk mund t’u japë karakter atyre që nuk e kanë. Gjëja e parë që vëren kur Interi luan në Ligën e Kampionëve është se kundërshtarët e tyre nuk frikohen nga fakti që luajnë kundër tyre (zikaltërve)”.

“Kjo ka ndodhur me vite, ndërsa as transferimet e reja nuk kanë pasur personalitet të mjaftueshëm për t’u lënë përshtypje lojtarëve tjerë”, ka thënë Suarez “Il Corriere dello Sport

Puyol vendos për kontratë të re


Carles Puyol ka vendosur t’i heshtë spekulimet e deritanishme dhe të nënshkruajë kontratë të re me Barcelonën, e cila do ta mbajë në Camp Nou deri në vitin 2013.
Kontrata aktuale e kapitenit skadon në fund të këtij sezoni, ndërsa deri më tani palët nuk kanë mundur të arrijnë në një pikë të përbashkët për të nënshkruar kontratë të re, duke nxitur interesimin e skuadrave të shumta për mbrojtësin spanjoll.

Sipas njoftimeve të reja, Puyol, i cili është lojtar i Barcelonës që nga vitit 1995, ka vendosur të nënshkruajë kontratë të re dhe të qëndrojë me Blaugranët deri kur të mbushë 35 vjet. Ndërsa konfirmimi zyrtar dhe nënshkrimi pritet të bëhet javën që vjen.

Benitez: Jemi më të mirë sa që mendoni


Trajneri i Liverpoolit, Rafa Benitez, thotë se skuadra e tij është në gjendje që të dëshmohet në ndeshjen e të dielës kundër Manchester Unitedit, kështu që t’i japë fund formës së dobët, me ç’rast ka regjistruar katër humbje radhazi.
“Jam sigurt se skuadra jonë është shumë më e mirë se sa që mendojnë njerëzit. Nëse ke tre, katër ose pesë lojtarë startues të lënduar, atëherë nuk mund të thuash se ekipi nuk është i fortë”.

“Jam i sigurt se nëse i largon katër ose pesë lojtarë nga United, Chelsea ose Arsenali, do të ishte shumë e vështirë edhe për ta që të fitojnë ndonjë ndeshje”.

“Mendojmë se mund të fitojmë (kundër United), ndërsa në konferencën tjetër për shtyp do të flasim për katër pikë diferencë”, ka thënë Benitez duke iu referuar diferencës aktuale prej shtatë pikësh.

Zyrtare: Quique Sanchez Flores trajner i ri i Atleticos

Të premten mbrëma Quique Sanchez Flores është zyrtarizuar si trajner i ri i Atletico Madrid, duke zënë kështu vendin e lënë bosh pas shkarkimit të Abel Resinos.
Në dhjetë e para të sezonit, në të gjitha garat, Atletico ka dështuar të përsërisë formën nga sezoni i kaluar, ashtu që drejtuesit e skuadrës kryeqytetase morën vendim për shkarkimin e trajnerit të deritanishëm, duke caktuar trajner ish-trajnerin e Valencias dhe Benficas, Quique.

Konfirmimi është bërë në faqen zyrtare të Atletico Madridit, sipas të cilit Quique Sanchez Flores do ta drejtojë skuadrën deri në fund të këtij sezoni.

Mourinho: Fitorja e Milanit ndaj Realit ishte po aq historike sa humbja nga Cyrihu

Trajneri i Interit, Jose Mourinho, nuk ka mundur që të mos flasë për fitoren e rivalëve të qytetit kundër Real Madridit në Santiago Bernabeu.
“Jam i lumtur për Milanin dhe Leonardon. Ata kanë pasur një sezon të vështirë. (Por) ata po luajnë më mirë se ne në Ligën e Kampionëve”.

“Fitorja në Bernabeu ishte historike, sikurse edhe humbja nga Zurichu në San Siro”, ka thënë portugezi në një konferencë për shtyp, duke shtuar se edhe pse Interi gjendet në një grup të vështirë, megjithatë Nerazzurët do të jenë njëra nga dy skuadrat që do të vazhdojnë tutje.

Dossena: Liverpooli do të rikthehet

Mbrojtësi i Liverpoolit, Andrea Dossena, beson se ekipi i tij do të kthehet në formën më të mirë pas paraqitjeve të dobëta në katër ndeshjet e fundit.
Të dielën Liverpooli do të jetë nikoqir i Manchester Unitedit në Anfield, ndërsa mbrojtësi italian mendon se Redsat mund të kthehen pikërisht nga kjo ndeshje.

“Mendoj se mund të rikthehemi. Nuk kemi fituar në katër ndeshjet e fundit, ndërsa sërish kemi ndeshje të vështira kundër Manchester United dhe Lyon”.

“Shpresojmë që të rikuperohen Fernando Torres, Albert Riera dhe Steven Gerrard, të cilët janë lojtarët kryesorë në këtë skuadër”, ka thënë Dossena për Tuttonapoli.it./

Ronaldo: Jam i gatshëm të luaj


Superylli i Real Madridit, Cristiano Ronaldo, thotë se është i gatshëm të luajë këtë fundjavë kundër Sporting Gijonit, përkundër se stafi mjekësor i Los Blancos nuk pajtohet me vendimin e tij.
Është pritur që portugezi do të mungonte edhe dhjetë ditët e ardhshme, mirëpo ai thotë se nuk ndjen më dhimbje në nyje.

“Nyja nuk më dhemb dhe mendoj se jam i gatshëm të luaj”, është cituar portugezi nga “Marca”.

Sipas kësaj të përditshmeje, Ronaldo kishte kërkuar të paraqitej në sfidën e mesjavës kundër Milanit, mirëpo stafi mjekësor nuk e kishte lejuar. Sido që të jetë, ndoshta trajneri Manuel Pellegrini nuk do të rrezikojë as këtë vikend dhe nuk do ta inkuadrojë në fushë.

Oddo: Kaka është penduar për largimin nga Milano

Massimo Oddo është i bindur se ish-bashkëlojtari i tij te Milani, Kaka, është penduar që është larguar nga ekipi italian për të kaluar te Reali i Madridit.
Pasi ndihmoi ekipin e tij të mposhtë Realin e Kakas, Oddo ka thënë se braziliani është penduar për hapin që e ka bërë.

“Mbase këtë mbrëmje ai mendoi, pse nuk qëndrova në Milan”, ka thënë 33-vjeçari italian.

“Në një takim si ky, përkrahja nga gjithkush është e rëndësishme. Jemi shumë të kënaqur nga ky takim. Është hera e parë që Milani fiton në Madrid. Ne udhëtuam me një disponim pozitiv pas fitores ndaj Romës”, ka shtuar Oddo./

Pato: Dua të qëndroj te Milan

Sulmuesi i Milanit, Alexandre Pato, është shprehur mjaft i kënaqur me performancën e tij kundër Real Madridit dhe njëkohësisht ka përsëritur vendimin tij për të qëndruar në San Siro.
“I thash vetes: ‘Ale duhet ta prekësh rrjetin!’ Dhe e bëra. Dëshiroj të jem pjesë e historisë së futbollit dhe dy golat kundër Real Madridit janë vetëm fillimi i kësaj historie”.

“Iu kam thënë disa miqve të mi se do të jetë dita ime dhe se nuk mund të dështoj në Bernabeu. Ishte shumë e rëndësishme dhe tash jam i lumtur”, ka thënë 20-vjeçari

Ndërkohë, i pyetur nëse do të largohej nga Milani për një shumë të madhe parash, Pato është përgjigjur: “Nuk e di... Por unë sapo e kam rinovuar kontratën time dhe dëshiroj të qëndroj këtu”.

Arshavin: Arsenali i dyti pas Barcelonës

Ylli i Arsenalit, Andrey Arshavin, duket se vazhdon të ketë joshje për kampionin e Spanjës dhe Evropës, Barcelonën, pasi ka deklaruar së fundi se ekipi anglez luan futbollin e dytë më të mirë, vetëm pas atij spanjoll.
“Futbolli më i bukur nuk është këtu, por në Barcelona. Por pas tyre mbase është Arsenali. Neve ndoshta na mungojnë dy lojtarë të klasit”.

“Kur transferimi (në Barcelona) u bllokua, sigurisht se isha i shqetësuar. Por pastaj e mora si fakt, ishte fat. Dhe sigurisht u zhvendosa në Arsenal. Mendoj se klubi im i tashëm është i dytë më argëtues në futbollin modern. Ia ka vlejtur”, ka thënë Arshavin./