Lajmet nga Sporti 26.07.2009

Effenberg: Ribery do të shkojë te Reali



Legjenda e Bayern Munichut, Stefan Effenberg, beson se është vetëm çështje kohe transferimi i Franck Ribery te Real Madridi.
“Besoj se do të ndodhë, por askush nuk e di kur. Megjithatë mendoj se lojtari duhet të jetë i sinqertë me klubin e tij, dhe të mos nënshkruajë kontrata të cilat nuk planifikon t’i respektojë”.

“Mund ta paramendoj se në një rast të këtillë, paratë janë një faktor shumë i rëndësishëm, dhe shifrat e tilla luajnë me kokën tënde”, ka thënë Effenberg për gazetën “TZ”.

City: Terry, Toure dhe Lescott deri fund të gushtit




Manchester City është i vendosur që të ndërtojë një skuadër e cila do t’ia sigurojë një vend në Ligën e Kampionëve në sezonin e ardhshëm.
“The Times” shkruan se deri në fund të gushtit, ‘pasanikët’ planifikojnë blerjen e John Terry (Chelsea), Kolo Toure (Arsenal) dhe Joleon Lescott (Everton).

Njoftohet se City planifikon të shpenzojë afër 100 milionë funte (115.6 milionë euro) për të transferuar këta lojtarë.

Parejo lojtar i Getafes




Dani Parejo ka kompletuar transferimin nga Real Madridi te Getafe.
Getafe ka konfirmuar zyrtarisht blerjen e lojtarit, i cili ka kushtuar 3 milionë euro, ndërsa Mbretërit e kanë lënë hapur edhe opsionin e blerjes së sërishme brenda dy vitesh.

20-vjeçari gjysmën e parë të sezonit të kaluar ishte i huazuar te Queens Park Rangers, ndërsa në dhjetor u kthye në Bernabeu.

Torres dëshiron sukseset e Ronaldos




Sulmuesi i Liverpoolit, Fernando Torres, dëshiron të arrijë sukseset e Cristiano Ronaldos.
“Kuptohet, ambicia ime është që të më shohin ashtu siç ishte Cristiano Ronaldo te Manchester United”.

“Por për të bërë atë duhet që Liverpooli të fitojë trofe. Dhe vetëm atëherë njerëzit do të flasin në të njëjtë mënyrë për Liverpoolin dhe mua, sikurse për Unitedin dhe Ronaldon”, ka thënë spanjolli për “Daily Mirror”.

Lampard: Chelsea nuk ka nevojë për përforcime



Mesfushori i Chelseat, Frank Lampard, thotë se Blutë nuk kanë nevojë të bëjnë shpenzime të mëdha këtë afat kalimtar pasi që kanë një ekip të mirë.
Deri më tani, Chelsea ka siguruar shërbimet e Yuri Zhirkov dhe Daniel Sturridge, dhe kuptohet ka angazhuar trajnerin Carlo Ancelotti.

“Nuk mendoj se është e domosdoshme që Chelsea të shpenzojë shuma të mëdha parash”.

“Ka disa lojtarë të cilët po të vinin këtu do të ishin shtesë e mirë e klubit, po ashtu ka miliona të tjerë, të cilët nuk do të sillnin shumë në skuadër, sepse ne tashmë jemi shumë të fortë”, ka thënë Lamps për “News of the World”.

Totti: Do ta kisha fituar Topin e Artë në ndonjë skuadër tjetër



Simboli i Romës, Francesco Totti, së bashku me ikonën e Juventusit, Alessandro Del Piero, dhe legjendën e Real Madridit, Raul, janë ndër lojtarët e rrallë aktivë që e kanë kaluar thuajse gjithë karrierën në një klub të vetëm duke u bërë 'flamurët' të skuadrave të tyre.
Së shpejti Totti do të nënshkruajë kontratë të re me Giallorossët deri në vitin 2019, e cila do të mbajë në Olimpico deri në fund të karrierës dhe pastaj do t’i jepet ndonjë rol menaxherial.

“Roma është zgjidhja e jetës time. Mendoj se e kam merituar këtë kontratë të re me atë që kam treguar në fushë, dhe me respektin që kam pasur për familjen Sensi, për bashkëlojtarët e mi, për trajnerin dhe për tifozët”.

“Po të kisha shkuar në ndonjë skuadër tjetër, do ta kisha fituar Topin e Artë, mirëpo jam i lumtur që kam qëndruar, sepse ky ka qenë vendimi i zemrës time”, ka thënë numri dhjetë i Romës.

Në formën e tij më të mirë, Totti është kërkuar nga të gjitha skuadrat e mëdha evropiane, mirëpo ai vendosi që t’ia kushtojë të gjithë karrierën Romës, edhe pse ndoshta ka humbur shumë në planin personal.

Ibra i lumtur si fëmijë





Në ditët në vijim do të nënshkruhet edhe kontrata e transferimit të Zlatan Ibrahimovicit te Barcelona, ndërsa “El Mundo Deportivo” e ka cituar lojtarin të ketë thënë se është shumë i entuziazmuar që do të luajë për Blaugranët.
“Jam i lumtur si një fëmijë. Mezi po pres të filloj këtë aventurë të re. Jam pafundësisht i lumtur”, është cituar të ketë thënë Ibracadabra.

Ibrahimovic do të kalojë nga Interi te Barcelona, ndërsa veç shumës prej 50 milionë eurosh, katalunasit do t’ua japin zikaltërve edhe kartonin e Samuel Eto’o-s, ndërsa Aliaksandr Hleb do të kalojë në Giuseppe Meazza në formë huazimi.

Pato nuk dëshiron të luajë si qendërsulmues




Milani nuk arrin të sigurojë një qendërsulmues, dhe kjo mund ta detyrojë trajnerin Leonardo që ta angazhojë Alexandre Paton në këtë rol.
Në një intervistë me “La Gazzetta dello Sport”, braziliani ka kërkuar nga trajneri i tij që të mos e detyrojë të luajë si sulmues kryesor, pasi që ai më mirë luan prapa qendërsulmuesit.

“Këtë sezon dëshiroj të luaj si sulmues i dytë. Nuk e kam fizikun për të luajtur si sulmues i parë”.

“Nëse do të luaj në pozitën time më të mirë në vazhdimësi, atëherë do të luaj shumë më mirë sesa sezonin e kaluar”, ka thënë 19-vjeçari.

Iaquinta dëshiron trofeun e Peace Cup



Sulmuesi i Juventusit, Vincenzo Iaquinta, thotë se skuadra e tij dëshiron ta fitoje Kupën e Paqes.
Zonja e Vjetër e filloi për së mbari këtë turne duke e mposhtur Sevillan të premten mbrëma me rezultat prej 2-1, ndërsa Iaquinta ishte njëri nga golashënuesit.

“Ne jemi këtu për të fituar, dhe nëse luajmë kundër Real Madridit, atëherë do të dëshirojmë edhe më shumë për të fituar”.

“Këto ndeshje janë gjithmonë të rëndësishme dhe ne po paraqitemi mirë. Ende jemi duke e pritur Diegon, ashtu që të luajmë në mënyra të ndryshme’, tha sulmuesi italian për “Goal.com Italia”.

Arsenali bën ofertë për Huntelaar



Mediat britanike njoftojnë se Arsenali ka bërë një ofertë prej 17.3 milionë euro për sulmuesin e Real Madridit, Klaas-Jan Huntelaar.
“Sunday Express” shkruan se trajneri Arsene Wenger e ka caktuar holandezin si zëvendësues të Emannuel Adebayor, i cili u largua në drejtim të Manchester Cityt.
Ndërkohë, trajneri i Realit, Manuel Pellegrini, ka thënë se Huntelaar nuk ka vend në skuadrën e tij, prandaj transferimi i holandezit në Emirates është më se i mundur, porse Topçinjtë duhet të konkurrojnë me Tottenham Hotspur për të siguruar shërbimet e ish-sulmuesit të Ajaxit.

Terry: Nuk largohem nga Chelsea



Kapiteni i Chelseat, John Terry, u ka dhënë fund spekulimeve disajavëshe në lidhje me të ardhmen e tij, duke thënë se do t’i qëndrojë besnik skuadrës aktuale.
Manchester City është shumë i interesuar për të fituar shërbimet e mbrojtësit anglez, saqë i ka ofruar një pagë rekorde për të veshur fanellën e ‘pasanikëve’.

Mirëpo, në fund 28-vjeçari ka heshtur spekulimet duke thënë se do të vazhdojë të luajë në Stamford Bridge dhe nuk do të ndërrojë fanellë.

“Së fundmi ka pasur shumë spekulime në lidhje me të ardhmen time, prandaj dëshiroj ta pastroj këtë gjë njëherë e përgjithmonë”.

“Unë i jam përkushtuar plotësisht Chelseat dhe gjithmonë ka qenë kështu. Po ashtu, Chelsea gjithmonë ma ka bërë të qartë se nuk e ka në plan të pranojë ndonjë ofertë për mua”, shkruan në deklaratën e Terryt në faqen zyrtare të Bluve.

Toure i entuziazmuar për Ibrahimovicin



Yaya Toure beson se Zlatan Ibrahimovici do të dëshmojë të jetë transfer shumë i suksesshëm në Camp Nou.
“Ai është i gjatë dhe është sulmues me aftësi teknike, ndërsa kualitetet e tij mund të na ndihmojnë shumë”, ka thënë Toure për faqen zyrtare të Barcës.

Mediat spanjolle kanë spekuluar se trajneri Pep Guardiola mund ta angazhojë lojtarin nga Bregu i Fildishtë që të luajë si mesfushor ofanziv, duke qenë se deri më tani Toure ka dalë i suksesshëm në të gjitha pozitat ku ka luajtur.

“Unë jam një lojtar ekipor që mundohem të jap më shumë për punën kolektive sesa për performancën time personale”, është shprehur ish-lojtari i Monacos.

Ferrara tashmë i dashuruar në Juven e tij




Pas fitores prej 2-1 kundër Sevillas në kuadër të Peace Cup, trajneri i Juventusit, Ciro Ferrara, tashmë ka fituar vetëbesim për fuqinë e të zgjedhurve të tij.
“Fitorja padyshim që na ka dhënë vetëbesim. Suksesi të ndihmon të punosh në një mënyrë më të relaksuar dhe të jep entuziazëm për të shkuar përpara”.

“Duhet të shtoj se e mposhtëm Sevillan, e cila është njëra nga top-skuadrat evropiane”.

“Jemi këtu për ta fituar Kupën e Paqes. Do të ishte interesante ta mposhtnim Cristiano Ronaldon dhe ekipin e tij (Real Madrid). Jam shumë i lumtur për formën e skuadrës time, mirëpo padyshim një fitore e një kalibri të madh do të ishte një shtytje maksimale”, ka thënë Ferrara për “Corriere dello Sport”.

Gattuso: Milanit i mungon ‘diçka’



Milani nuk po ka sukses në transferimin e lojtarëve këtë afat kalimtar duke marrë parasysh edhe buxhetin e kufizuar, ndërsa mesfushori Gennaro Gattuso ka thënë se Rossonerët kanë nevojë për përforcime.
“Milani është skuadër konkurrente, mirëpo neve na mungon diçka. Deri më 31 gusht do të shpresojmë për një dhuratë nga presidenti ynë”.

“Kemi nevojë për një qendërsulmues dhe një mbrojtës krahu, përndryshe Milani ende është skuadër e fuqishme me ata lojtarë që ka”, ka thënë Rino për “SkySport24”.

Ancelotti: Zhirkov do të bëjë emër te Chelsea





Menaxheri i Chelseat, Carlo Ancelotti, ka deklaruar se transferimi i ri i Bluve, Yuri Zhirkov, do të bëhet një emër i madh në Stamford Bridge.
“Zhirkov nuk është befasi. Ai është një lojtar shumë i mirë”, ka thënë Ancelotti për “The Mirror” duke iu referuar golit të cilin e shënoi rusi kundër Milanit.

Pastaj, trajneri i ka thënë edhe disa fjalë për ndeshjen kundër ish-skuadrës së tij.
“Milani luajti mirë, por ne u angazhuam më shumë dhe jemi të lumtur me fitoren. Ne e dimë që duhet të përmirësohemi më shumë”, ka shtuar Ancelotti.

Cruz drejt Romës




Duket se sulmuesi argjentinas Julio Cruz ka vendosur për të ardhmen e tij, ndërsa Roma është skuadra ku ai dëshiron ta vazhdojë karrierën.
“Sky Sport 24” shkruan se ish-sulmuesi i Interit do të nënshkruajë kontratë njëvjeçare, me opsionin për ta vazhduar edhe një vit. Ndërsa do të fitojë 1.8 milionë euro për sezon.

Cruz refuzoi një pagë të madhe nga Panathinaikosi për të qëndruar në Itali, ndërsa nga Serie A, Lazio dhe Napoli kanë qenë skuadrat më të interesuar për shërbimet e tij.

Bruce konfirmon interesimin për Darren Bent



Menaxheri i Sunderlandit, Steve Bruce, ka konfirmuar se është në bisedime me Tottenham Hotspur për të siguruar shërbimet e sulmuesit Darren Bent.
“Darren Bent është një tjetër lojtar ku e kemi përqendruar interesin tonë. Bisedimet po shkojnë shumë mirë”.

“Shpresojmë se do të mund të bëjmë diçka. Duhet të arrijmë marrëveshje për çmimin- dhe kjo ende nuk është arritur. Megjithatë ne jemi duke biseduar”, ka thënë Bruce për “Sunday Sun”.

Ditë më parë Sunderlandi siguroi shërbimet e mesfushorit kosovar Lorik Cana.