Lajmet nga Sporti me 03.10.2009

Benitez: Nëse e ndalim Drogban, e kemi ndalur Chelsean



Menaxheri i Liverpoolit, Rafael Benitez, ka kërkuar nga lojtarët e tij që të kenë kujdes nga sulmuesi i Chelseat, Didier Drogba, në ndeshjen e të dielës në Stamford Bridge.
“Njerëzit mund të kenë mendime të ndryshme për të (Drogban), por nuk mund të thuash se ai është diçka tjetër, veçse një kundërshtar i rrezikshëm”.

“Duhet ta menaxhojmë kërcënimin të cilin ai e ka, dhe nëse e bëjmë këtë, mendoj se gjithçka do të jetë në rregull”, ka thënë Rafa për “Daily Mail”.

Shqipëria takim miqësor me Estoninë




Edhe pse ende nuk kanë përfunduar ndeshjet eliminatore për Kampionatin Botëror 2010, Federata Shqiptare e Futbollit dhe trajneri i përfaqësueses së Shqipërisë, Josip Kuzhe, kanë filluar përgatitjet për Kampionatin Evropian 2012.
Për të siguruar një përgatitje të mirë, Shqipëria ka filluar me caktimin e ndeshjeve miqësore, ndërsa Top Channel njofton se me 14 nëntor, Shqipëria do të përballet në një ndeshje miqësore me Estoninë.

Kuqezinjtë do të jenë mysafirë në stadiumin “Lilekula” të kryeqytetit të Estonisë, Talin.

Miqësorja konsiderohet një mundësi e mire për të eksperimentuar me lojtaret dhe me skemat e ndryshme të lojës së kuqezinjve duke qenë se Estonia është në nivel më të ulët se Shqipëria.

Totti luan kundër Napolit



Simboli i Romës, Francesco Totti, do të jetë në gjendje të luajë të dielën kundër Napolit në Derby del Sole.
Është menduar se Totti nuk do të mund të luajë në këtë ndeshje, mirëpo “Sky Sport Italia” njofton se kapiteni është paraqitur në fushën stërvitore të shtunën ashtu që nesër do të jetë në dispozicion të trajnerit Claudio Ranieri.

Ndërkohë, dyshja braziliane, Julio Baptista dhe Juan, do të mungojnë në këtë përballje, si pasojë e lëndimeve, ndërsa Matteo Brighi është në dyshim.

Java e dhjetë në Raiffeisen Superliga



Këtë vikend zhvillohen ndeshjet e javës së dhjetë të Raiffeisen Superligës së Kosovës në futboll.
Sot janë duke u zhvilluar dy përballje, ajo ndërmjet KEK-ut dhe Kosovës (V), si edhe Drenica është nikoqir i Gjilanit.

Ndeshjet tjera do të zhvillohen të dielën, ku bie në sy takimi Prishtina-Hysi.

Ndeshjet e xhiros së dhjetë në Raiffeisen Superliga (nga ora 15:00):

E shtunë

KEK-u - Kosova (V)
Drenica - Gjilani.

E diel

Vëllaznimi - Ferizaj
Flamurtari Liria
Besa Trepça dhe
Prishtina - Hysi

Melo: Na duhet më shumë kohë



Mesfushori i Juventusit, Felipe Melo, e ka mbrojtur skuadrën e tij nga kritikat pas barazimeve të njëpasnjëshme, duke thënë se bardhezinjve iu duhet kohë për t’u përshtatur.
“Dëshiroj që Juventusi të jetë solid dhe jam i bindur se do të bëhemi më të fortë. Njëherë duhet ta njohim njëri-tjetrin më mirë”.

“Lojtarët e Interit janë stërvitur bashkë tre ose katër vite, ndërsa ne jemi duke e bërë këtë për vetëm disa muaj. Na duhet kohë”, ka thënë braziliani për “Tuttosport”.

Wenger: Arshavin mund të bëhet më i miri



Menaxheri i Arsenalit, Arsene Wenger, thotë se është i entuziazmuar me mënyrën se si i qaset Andrey Arshavin futbollit, duke shtuar se rusi mund të bëhet njëri nga lojtarët më të mirë të të gjitha kohërave.
“E dua Arshavinin sepse ai kë gjëra shumë unikate. Është lojtar inteligjent dhe është shumë mendjehollë, sepse ai gjithmonë krijon diçka në situata të papritura”.

“Ai ka një sfidë të madhe para vetes. Ai e bëri St Petersburgun fitimtar, dhe nëse bën që edhe Arsenali të fitojë, atëherë do të jetë nga më të mirët e të gjitha kohërave”, ka thënë Wenger.

Megjithatë Ronaldo nuk do të luajë kundër Sevillas



Cristiano Ronaldo nuk do të jetë në ekipin e Real Madridit që do të udhëtojë në Ramon Sanchez Pizjuan për t’u përballur të dielën me Sevillan.
Trajneri i Los Blancos, Manuel Pellegrini, ka publikuar emrat e lojtarëve që do t’i ketë në dispozicion për atë ndeshje, ndërsa aty nuk figuron emri i superyllit portugez.

Ronaldo pësoi një lëndim në ndeshjen e Ligës së Kampionëve kundër Marseille, ndërsa edhe pse stafi mjekësor i Mbretërve mendonte se ai mund të luajë të dielën, Pellegrini nuk dëshiron të rrezikojë.

Skuadra e plotë e Realit që do të jetë në dispozicion të Manuel Pellegrinit: Iker Casillas, Pepe, Sergio Ramos, Diarra, Raul, Kaka, Benzema, Marcelo, Dudek, Guti, Drenthe, Albiol, Garay, Higuain, Metzelder, Xabi Alonso, van der Vaart, Granero.

Baggio: Juve mund ta fitojë Scudetton




Legjenda italiane Roberto Baggio është i mendimit që Juventusi mund ta fitojë Scudetton këtë sezon.
“Bianconerët janë më të fortë sesa ishin sezonin e kaluar, dhe mendoj se mund ta fitojnë Scudetton”, ka thënë ish-sulmuesi i Juves.

Të dielën, bardhezinjtë udhëtojnë në Palermo ku do të mundohen të nxjerrin tri pikë për t’i konkurruar Sampdorias në tabelë.

Di Natale: Jam i gatshëm ta ndëshkoj Cesarin




Të shtunën mbrëma Interi është nikoqir i Udineses në Giuseppe Meazza, ndërsa sulmuesi mysafir Antonio Di Natale thotë se është i përgatitur për të shënuar në portën e zikaltërve.
‘Toto’ ka shënuar tetë gola në gjashtë ndeshjet e para duke arritur rekordin e vendosur nga Gabriel Batistuta para dhjetë vitesh.

“Julio Cesar është një portier i mirë, por unë do të mundohem të shënoj kundër tij”.

“Mendoj se mund t’i vëmë në vështirësi me mënyrën tonë të lojës. Ata nuk e kanë pasur asnjëherë të lehtë që të fitojnë ndaj nesh”, ka thënë Di Natale për “Tuttosport”.

Zaccheroni: Leonardos i duhet kohë




Ish-trajneri i Milanit, Alberto Zaccheroni, mendon se trajneri aktual i Rossonerëve, Leonardo, ka nevojë për më shumë kohë për të ndërtuar një sistem të mirë të lojës.
“Leonardo është sikurse Pato. Është i ri dhe nevojitet durim. Kur një trajner përjeton përvojën e parë, atëherë rezultatet do të vijnë më vonë”.

“Nuk mendoj se Milani është në krizë. Kampionati është ende i hapur”, u ka thënë Zaccheroni gazetarëve.