Lajmet Nga Sporti 20.10.2009

City do ta shesë Robinhon nëse do të transferojë Riberyn





City do ta shesë Robinhon nëse do të transferojë Riberyn
Manchester City ka dhënë shenja se është i gatshëm të shesë sulmuesin brazilian Robinho te Barcelona, por vetën nëse do të mund të transferojë mesfushorin francez Franck Ribery.
Barcelona thuhet të jetë tepër e interesuar të transferojë yllin brazilian dhe është duke bërë plan të dërgojë ofertë në drejtim të Cityt.

Por ekipi anglez raportohet se do të lejojë largimin e tij vetëm nëse do të gjejë një zëvendësim adekuat, dhe një prej të përmendurve është superylli i Bayern Munichut, Ribery.

Francezi është lidhur me një largim nga Bayerni gjatë muajve të fundit dhe është raportuar se ai tashmë ka një marrëveshje me Real Madridin për t’u transferuar këtë verë. Por nëse jo, City gjithmonë është i gatshëm të ndajë shuma të mëdha parash për të bindur klubin gjerman dhe vetë lojtarin.

Wenger: Chamakh e di se nuk do të nënshkruaj me të




Menaxheri i Arsenalit, Arsene Wenger, thotë se ai ia ka bërë të qartë sulmuesit të Bordeaux, Marouane Chamakh, se nuk do të nënshkruajë me të.
Klubi nga Londra vazhdimisht është lidhur me transferim të marokenit gjatë verës së kaluar, por duket se strategu francez nuk është më i interesuar për sulmuesin e vlerësuar lart.

“Ai është një lojtar që më pëlqen, por kam shumë sulmues. Sinqerisht, Bordeaux nuk ishin shumë të drejtë, ata kërkuan shumë para dhe unë nuk do të paguaja aq”.

“Madje edhe e kam kontaktuar Chamakh për t’i thënë, ‘Dëgjo, Eduardo sapo është rikthyer dhe unë nuk dua të të blej dhe të të mbaj në stol’,”, ka thënë Wenger në një intervistë për L’Equipe

Cech kërkon më shumë përqendrim në mbrojtje




Portieri i Chelseat, Peter Cech, ka thënë se ekipi ka nevojë për t’u forcuar në mbrojtje dhe veçanërisht të jetë i kujdesshëm nga ndërprerjet.
Blutë shumicën e golave këtë sezon i kanë pranuar jo nga loja e hapur por nga goditjet e akorduara (kornerë, gjuajtje të lira), dhe Cech mendon se kjo po i kushton ekipit.

“Në dy ndeshjet e fundit në udhëtim, kemi marrë tre gola nga ndërprerjet, andaj kemi nevojë për të qenë më të disiplinuar në mbulim dhe të shmangim këto gola pasi mund të na kushtojnë”, ka thënë Cech.

“Për momentin jemi ca edhe të pafat, por e dimë se duhet të jemi më të vëmendshëm dhe të kemi përqendrim më të mirë herën e ardhshme”, ka shtuar çeku.

Cech ka shtuar se takimi i nesërm i Ligës së Kampionëve kundër Atletico Madrid është një shans i mirë për blutë të marrin veten pas humbjes së vikendit nga Aston Villa.

Govou: Presioni është në Liverpoolin



Sulmuesi i Lyonit, Sidney Govou, beson se i gjithë presioni i takimit të sotëm të Ligës së Kampionëve që do të zhvillohet në Anfield bie mbi Liverpoolin.
30-vjeçari thotë se të kuqtë janë në vështirësi kohëve të fundit për shkak të paraqitjeve të dobëta në ligë dhe do të kërkojnë me çdo kusht një rezultat pozitiv në këtë ndeshje.

“Nuk është test për ne. Është një vazhdim i Ligës së Kampionëve. Por është një ndeshje e madhe për ta. Është shumë më e rëndësishme për ta se sa për ne”, ka thënë Govou.

“Liverpool është nën atë ku pritej të ishte në fillim të sezonit. Një barazim do të ishte rezultat i mirë për ne. Por Liverpooli është favorit në grup, edhe pse ata ende nuk e kanë pasur fillimin e mbarë të sezonit, dhe ata kanë nevojë për pikë për të mbetur në garë për kualifikim”, ka shtuar francezi.

Të kuqtë kanë një fitore dhe një humbje në dy takimet e para të Ligës së Kampionëve, derisa Lyoni ka fituar të dy ndeshje pa pranuar gol.

Fabregas: Wenger nuk na le as të pushojmë





Kapiteni i Arsenalit, Cesc Fabregas, thotë se shtytja e vazhdueshme nga Arsene Wenger e ka bërë atë një yll botëror.
Mesfushori spanjoll është me topçinjtë që nga mosha 16-vjeçare, ku erdhi nga Barcelona, dhe thotë se është plotësisht i kënaqur në klubin londinez.

“Ai (Wenger) kurrë nuk është i kënaqur plotësisht me atë që ne bëjmë. Nëse e sheh se ju mendoni se jeni në formën më të mirë, ai gjithmonë vjen të ju shohë, ju tregon një video dhe ju gjen diçka që keni bërë gabim. Ai gjithmonë më thotë se duhet të përmirësoj lojën time defensive”, ka thënë Fabregas.

Bodgani: Nuk kemi frikë nga Milani




Sulmuesi kuqezi Erjon Bogdani ka thënë para ndeshjes së vikendit përballë Milanit se Chievo nuk ka frikë nga rosonerët.
Shqiptari shënoi golin e vetëm për Chievon që u mposht në shtëpi të vet nga Bari gjatë vikendit të fundit, dhe është optimist para takimit të vështirë të së dielës.

“Ne mund ta mposhtim gjithkënd, e kemi dëshmuar këtë disa herë, edhe pse kundërshtari ynë kësaj here është Milani. Është kundërshtari i duhur për t’i treguar secilit se ne nuk jemi në vështirësi”, ka thënë Bogdani për Sportmediaset.

“Kundër Barit nuk ishim të mirë, por mund të kishim barazuar dhe arbitri nuk akordoi dy penalti për ne”, është ankuar sulmuesi shqiptar.

Chievo qëndron në pozitën e nëntë në tabelën e Serie A, së bashku me Barin, Romën dhe Udinesen, që të gjithë me nga 11 pikë.

Pato: Ndeshja në Bernabeu realizim i ëndrrës



Sulmuesi i Milanit, Alexandre Pato, ka thënë se ndeshja e të mërkurës mbrëma në Santiago Bernabeu kundër Real Madridit, do të jetë realizim i ëndrrës së tij fëmijërore.
“Asnjëherë nuk kam luajtur në Bernabeu dhe do të jetë lojë e veçantë për mua. Është ëndërr të luash në atë stadium kundër një rivali aq të fortë, siç është Real Madridi”.

“Shpresoj të shfaqim një lojë të mirë dhe të nxjerrim diçka pozitive nga ai takim”, ka thënë braziliani për të përditshmen sportive “Marca”.

Cana lojtari i javës në Ligën Premier




Mesfushori shqiptar Lorik Cana, i cili aktivizohet te Sunderlandi, është shpallur lojtari më i mirë i javës së nëntë në Ligën Premier, sipas vlerësimeve të gazetave kombëtare angleze: “The Sun”, “Daily Star”, “Daily Mirror”, “Daily Mail”, The Times” dhe “Guardian”.
Cana shfaqi një lojë të shkëlqyer në fitoren e Sunderlandit përballë Liverpoolit, duke luajtur në dy pozita të ndryshme gjatë ndeshjes.

Në pjesën e parë, kosovari luajti në pozitën e tij, si mesfushor defensiv, ndërsa në pjesën e dytë ai mori rolin e qendërmbrojtësit për t’i ofruar siguri ekipit të vet.

Kapiteni i Sunderlandit është vlerësuar me notën 9, njëherit vlerësimi më i lartë i kësaj jave në Ligën Premier.